Sulmet në Gaza, mediat izraelite për përjashtimin nga UEFA: Nuk do të ndodhë
Nga OraNews Përditësimi i fundit 29 Shtator 2025, 15:45
Pas përhapjes së lajmeve në disa media evropiane se UEFA po shqyrton përjashtimin e Izraelit nga kompeticionet ndërkombëtare për shkak të situatës së tensionuar në Gaza, mediat izraelite raportojnë se një vendim i tillë nuk do të merret këtë javë.
Sipas tyre, UEFA i ka dërguar një letër zyrtare Federatës Izraelite të Futbollit, në të cilën sqarohet se nuk është planifikuar asnjë mbledhje e Komitetit Ekzekutiv për këtë javë – çka përjashton mundësinë e një vendimi të menjëhershëm.
Ideja për përjashtimin e Izraelit është shtyrë përpara nga presidenti i Paris Saint-Germain, Nasser Al-Khelaifi, i cili njëherësh është edhe kreu i Shoqatës së Klubeve Evropiane, me mbështetjen e Katarit. Iniciativa ka nxitur debat të gjerë në botën e sportit dhe diplomacisë, por për momentin, nuk pritet asnjë veprim konkret nga ana e UEFA-s.
Ndërkohë, tensionet në Lindjen e Mesme vijojnë të ndikojnë edhe në arenën ndërkombëtare sportive, ndërsa pritet që kjo çështje të rikthehet në diskutim në javët në vijim.
