Sllovakia shtyn votimin për ndryshimet kushtetuese që synojnë kufizimin e të drejtave të çifteve të së njëjtës gjini dhe ndërrimin e gjinisë
Nga OraNews Përditësimi i fundit 24 Shtator 2025, 20:31
Qeveria sllovake vendosi të mërkurën të shtyjë për një kohë të pacaktuar votimin për një amendament kushtetues që do të kufizonte të drejtat e çifteve të të njëjtit seks dhe do të vendoste kushte të rrepta për ndryshimin e gjinisë. Sipas kësaj propozite, legjislacioni kombëtar i Sllovakisë do të kishte përparësi ndaj atij europian në çështjet përkatëse.
Qeveria ka pranuar se nuk ka mjaftueshëm vota në parlament për të kaluar këtë nismë, e cila ka shkaktuar reagime të shumta në opinionin publik. Dy deputetë të shumicës konfirmuan se votimi është shtyrë dhe nuk është caktuar ndonjë datë e re.
Në fund të janarit, gjatë prezantimit të propozimit, kryeministri nacionalist Robert Fico u shpreh se synon të vendosë një bllokadë kushtetuese ndaj progresizmit, duke iu referuar traditave, trashëgimisë kulturore dhe shpirtërore të paraardhësve tanë, për të rikthyer arsyetimin e shëndoshë.
“Ne kemi dy gjini, mashkull dhe femër, të përcaktuara nga lindja. Gjinia nuk mund të ndryshohet, përveçse në raste të jashtëzakonshme, bazuar në kritere të përcaktuara me ligj”, thuhet në propozimin për ndryshimin e Kushtetutës.
