Më shumë mbetje për banor! Një individ krijoi 360 kg plehra në një vit! 19 % u ricikluan, 5% u dogjën për energji
Nga OraNews Përditësimi i fundit 24 Shtator 2025, 14:17
Gjatë vitit 2024 një banor në Shqipëri prodhoi 360 kilogram mbetje me një rritje të konsiderueshme. INSTAT raporton dhe një rritje të menaxhimit, ndërsa rreth 19 për qind e totalit u riciklua dhe 5 të tjera u dogj për të prodhuar energji. Pjesa tjetër kaloi në landfille
U prodhuan më shumë mbetje gjatë vitit të shkuar sasia e mbetjeve të prodhuar prej çdo banori në Shqipëri u rrit me 9 kilogram.
Sipas të dhënave të INSTAT një individ arriti në 360 kilogramë mbetje, nga 351 kilogramë që ishin një vit më pare.
Po ashtu bëhet e ditur se u arrit të menaxhohen gjithsej 862 mijë tonë mbetje urbane në 12 muaj, me një rritje prej 2,1 për qind kundrejt vitit të mëparshëm.
Pjesa më e madhe, plot 89,5 për qind, janë mbetje familjare dhe të ngjashme me to.
Mbi gjysmën e totalit e zënë mbetjet organike, ndërsa plastika dhe letra pasojnë me rreth 9–10 për qind secila.
Pjesa më e madhe e tyre kaloi në landfille, por INSTAT ka raportuar dhe për funksionim të djegësave, pa u specifikuar se për cilët prej tyre bëhet fjalë.
Nga mbetjet e mbledhura, 76,3 për qind u depozituan në landfill, 18,8 për qind u ricikluan, dhe 4,9 për qind u dogjën për energji, thuhet në raportin e INSTAT. Hedhjet e pakontrolluara janë reduktuar ndjeshëm, duke mbetur vetëm në 0,02 për qind të totalit.
Tashmë nisur dhe nga kërkesat për negociatat e integrimit është propozuar një plan i ri i menaxhimit të mbetjeve në vend. Për këtë kërkohet rritja e mundësisë së riciklimit por dhe format e tjera të rekomanduara edhe nga Bashkimi Evropian.
