VIDEO/ Gjimnazi i ri “Sulejman Elezi” në Laknas në kantier, do të mirëpresë mbi 800 nxënës
Nga OraNews Përditësimi i fundit 24 Shtator 2025, 11:19
Qeveria po investon për transformimin e shkollave me të njëjtin standard nga veriu në jug të vendit, për të garantuar kushte dinjitoze për mësim për nxënësit dhe stafet mësimore.
Investimet e qëndrueshme në shkolla, objekte sportive dhe ambiente ndihmëse, synojnë të rrisin aksesin, sigurinë dhe funksionalitetin e institucioneve arsimore.
Në prej tyre është investimi në gjimnazin e ri “Sulejman Elezi” në Laknas.
Kryeministri Edi Rama ndau sot pamje nga kantier, ndërsa bëri të ditur se ky investim i shërben mbi 800 nxënësve.
Gjimnazi do të ketë klasa moderne, bibliotekë, hapësira të gjelbra dhe terrene sportive, duke iu shtuar zinxhirit të shkollave model në Bashkinë e Kamzës.
30 shkolla të reja dhe të rehabilituara me 340 laboratorë smart hapën dyert për nxënësit dhe mësuesit në nisje të vitit të ri arsimor.
Në total në buxhetin e vitit 2025 është planifikuar ndërtimi ose rikonstruksioni i rreth 80 objekteve arsimore të arsimit bazë, me rreth 1000-1200 klasa dhe laboratorë, investime prej të cilave përfitojnë 25 mijë nxënës dhe 1500-2000 punonjës mësimorë.
Në kuadër të investimeve në arsim, vetëm gjatë vitit të kaluar u vendosën 216 laboratorë smart në shkolla.
