Politikanët britanikë dënojnë deklaratat e Elon Musk në protestën kundër emigracionit

Nga OraNews Përditësimi i fundit 15 Shtator 2025, 19:51

Kryeministri britanik, Keir Starmer dënoi sot deklaratat e Elon Musk duke i quajtur ato ” “të rrezikshme” – pasi pronari i X dhe Tesla tha në një tubim kundër emigracionit – se Britania e Madhe po përfshihej nga dhuna dhe se qytetarët britanikë duhet të luftonin ose të vdisnin, sipas AP.

Por, qeveria e Britanisë së Madhe i rezistoi thirrjeve të opozitës për të sanksionuar Musk pas këtyre deklaratave.

Starmer dënoi dhunën në protestat e së shtunës “Bashkoni Mbretërinë” me pjesëmarrjen e 100,000 ose më shumë njerëzve në Londër, të organizuar nga aktivisti i ekstremit të djathtë, Tommy Robinson.

Policia tha se 26 oficerë ishin plagosur, katër prej tyre rëndë, ndërsa një pakicë midis protestuesve u përpoq të shkelte vijat që i ndanin ata nga një kundër-demonstratë më e vogël anti-raciste.

Në këtë ngjarje u arrestuan 25 persona dhe Policia Metropolitane tha se arrestime të tjera do të pasonin.

Duke iu drejtuar demonstratës me anë të një lidhjeje me video, Musk bëri thirrje për shpërbërjen e Parlamentit dhe zgjedhje të parakohshme për të rrëzuar qeverinë e qendrës së majtë të Starmer.

“Dhuna po ju vjen, ose luftoni ose vdisni”, u tha protestuesve Musk.

Zëdhënësi i Starmer, Dave Pares, tha se nuk mendonte se publiku britanik do të duronte atë lloj gjuhe.

“Britania e Madhe është një vend i drejtë, tolerant dhe i mirë, kështu që gjëja e fundit që duan britanikët është një gjuhë e rrezikshme dhe nxitëse që kërcënon dhunën dhe frikësimin në rrugët tona”, tha ai.

Thirrje për sanksionim të Muskut
Ed Davey, kreu i Demokratëve Liberalë, partia e tretë më e madhe në Parlamentin e BM-së, i kërkoi Starmer, kreut të opozitës konservatore Kemi Badenoch dhe kreut të “Reform UK”, Nigel Farage te vendoseshin sanksione ndaj Musk – pas përpjekjeve të tij për të mbjellë përçarje dhe për të nxitur dhunë në rrugët britanike dhe për të ndërhyrë në demokracinë britanike.

Davey i kërkoi Starmer të bllokonte Tesla-n nga marrja e kontratave qeveritare.

Zëdhënësi i Starmer tha se qeveria nuk kishte plane për të sanksionuar Musk për shkak të deklaratave të tij.

“Protesta paqësore është thelbësore për vlerat e vendit tonë. Por ne nuk do të tolerojmë sulmet ndaj oficerëve të policisë – që bëjnë punën e tyre ose që njerëzit të ndihen të frikësuar në rrugët tona për shkak të prejardhjes së tyre ose ngjyrës së lëkurës së tyre”, tha Starmer në X.

Kjo nuk është hera e parë që Musk, një ish-aleat i presidentit Donald Trump, mbështet figura të së djathtës ekstreme dhe të së djathtës ekstreme në Evropë, përfshirë Robinson, themelues i Lidhjes së Mbrojtjes Angleze anti-Islame, emri i vërtetë i të cilit është Stephen Yaxley-Lennon, dhe partisë Alternativa për Gjermaninë, ose AfD.

Musk është gjithashtu një kritik i përpjekjeve të BM-së dhe qeverive të tjera evropiane për të ndaluar përmbajtjen e dëmshme në internet, diçka që ai argumenton se kufizon lirinë e fjalës.