Ujku sulmon 5-vjeçaren serbe në një plazh të Greqisë, si është gjendja e saj
Nga OraNews Përditësimi i fundit 15 Shtator 2025, 16:16
Një turiste nga Serbia ka raportuar një ngjarje tronditëse në Halkidiki, ku vajza e saj 5-vjeçare u sulmua nga një ujk në plazhin e Marmaras në Sithonia, të premten në mëngjes.
Sipas raportimit të nënës, vajza e vogël po luante e pa shqetësuar në plazh, kur rreth orës 08:00 të mëngjesit, një kafshë e egër, dyshohet një ujk, e sulmoi nga pas.
Ujku e kafshoi dhe e gërvishti në shpinë, por ndërhyrja e menjëhershme e nënës dhe një burri tjetër, të cilët goditën kafshën me gurë, bëri që ai të largohej dhe fëmija të shpëtohej.
Vajza u dërgua fillimisht në Qendrën Shëndetësore lokale, dhe më pas, për mjekim më të specializuar, në Spitalin e Poligjirosit ndërsa gjendja e saj shëndetësore nuk paraqet rrezik.
Për ekzistencën e ujqërve dhe çakejve në zonë foli për AEN-MEA përfaqësuesi i shtypit i Organizatës Mjedisore për Jetën e Egër dhe Natyrën “Kallisto”, Iason Bandios.
Ai konfirmoi praninë e tyre dhe shtoi se, në bashkëpunim me Zyrën Pyjore të Poligjirosit, janë vendosur kamera për të monitoruar sjelljen e kafshëve.
Z. Bandios u bëri thirrje banorëve që të informohen përmes faqes zyrtare të “Kallisto”, për mënyrat se si mund të mbrohen dhe si të ndihmojnë në mbajtjen e kafshëve të egra larg zonave të banuara.
