Lufta ndaj informalitetit/ Mbi 15 milionë lekë të ardhura shtesë në buxhet çdo muaj pas deklarimit
Nga OraNews Përditësimi i fundit 21 Gusht 2025, 09:21
Ministri i Ekonomisë, Kulturës dhe Inovacionit, Blendi Gonxhja deklaroi sot se lufta kundër informalitetit në tregun e punës vijon me masën “Zero Tolerancë”, duke sjellë rezultate konkrete.
Sipas ministrit, planifikimi i inspektimeve nga Inspektorati Shtetëror i Punës dhe Shërbimeve Shoqërore mbi bazë risku ka sjellë përmirësime të ndjeshme, duke evidentuar rritje të punëmarrësve informalë gjatë proceseve të inspektimit.
Gjatë periudhës janar-korrik 2025, janë futur në skemën e sigurimeve shoqërore dhe shëndetësore 1,316 punëmarrës informalë, nëpërmjet masës urgjente “Pezullim Aktiviteti”, duke kontribuar direkt në skemën e sigurimeve shoqërore dhe shëndetësore me një vlerë minimale prej 14,686,560 Lekë/muaj pas deklarimit në buxhet.
Ministri i bëri apel qytetarëve që të mos pranojnë të punojnë të pasiguruar ose të nënsiguruar, duke theksuar se çdo formë pune jashtë skemës së sigurimeve shoqërore është abuzim që duhet denoncuar.
