RIKTHEHET “MOKRA N’FEST”/ Festa e traditës dhe natyrës bën bashkë banorët dhe turistët e huaj (FOTO+VIDEO)
Nga Mola Luku Përditësimi i fundit 17 Gusht 2025, 15:15
Festivali i përvitshëm tradicional Mokra N’Fest u rikthye sërish këtë vit ku nuk munguan shfaqjet kulturore të zonës. Turistë nga Shqipëria dhe jo vetëm shijuan jo vetëm traditat por edhe kuzhinën tradicionale.
Banorë e turistë u bënë bashkë në Mokër të Pogradecit për të festuar e trashëguar më të mirat e traditës.
Ndarja e kulaçit, dollia me 101 shëndete dhe vallja dyshe e burrave u risollën në Urën e Golikut.
Turistët e huaj nuk e fshehin surprizën e ndërthurjes së traditës me bukurinë natyrore.
“Kam ardhur së me pëlqen shumë Mokra, gëzuar Festën Mokrës. Jam nga Peshkopia hera e parë në Mokër. Shumë bukur”
“Nga Rumania. Kam vjehrrin këtu. Kam burrin shqiptar. Kam dy vjet. Më pëlqen. Do rikthehem”
Vendasit cilësuan kuzhinën tradicionale si kulmin e këtij festivali.
Drejtori i Turizmit dhe Trashëgimisë Kulturore në Bashkinë Pogradec shpjegoi se këto evenimente shërbejnë jo vetëm për turizmin por edhe për ruajtjen e kulturës.
Organizatorët vlerësuan se aktiviteteve iu bashkuan më shumë se 4 mijë persona që u argëtuan nën ritmet e muzikës dhe shijuan ushqimet e bukuritë e Mokrës
