E rëndë në Poloni! Treni përplaset me furgonin, shpëton mrekullisht shoferi
Nga OraNews Përditësimi i fundit 7 Gusht 2025, 22:29
Një aksident dramatik është regjistruar në një kalim hekurudhor në fshatin Wola Filipowska, në jug të Polonisë, ku një tren është përplasur me një furgon. Ngjarja është filmuar nga kamerat e sigurisë dhe pamjet janë bërë publike të mërkurën, më 6 gusht, nga Policia e rajonit të Małopolskës.
Në video shfaqet një furgon i bardhë që afrohet në kalimin hekurudhor në momentin që barrierat e sigurisë fillojnë të ulen. I bllokuar mes barrierave, drejtuesi i furgonit përpiqet fillimisht të zmbrapset, por më pas lëviz përpara dhe ngjitet mbi shina, pikërisht në çastin kur treni po afrohej me shpejtësi.
Treni përplaset me furgonin, duke e shtyrë për disa metra përgjatë shinave, përpara se të vazhdojë lëvizjen e tij. Për fat të mirë, drejtuesi i mjetit arriti të dilte nga furgoni në kohë dhe nuk pësoi asnjë lëndim.
Autoritetet policore kanë bërë thirrje për kujdes të shtuar në kalimet hekurudhore dhe kanë theksuar rëndësinë e respektimit të sinjalistikës rrugore, për të shmangur incidente të ngjashme.
