Zgjedhjet e 11 Majit/ Berisha denoncon: U blenë vota duke përdorur pagesat për personat me aftësi ndryshe
Nga OraNews Përditësimi i fundit 6 Gusht 2025, 13:44
Kreu i PD-së, Sali Berisha ka denoncuar se në zgjedhjet e 11 Majit janë blerë vota, sipas tij, duke përdorur pagesat për personat me aftësi ndryshe.
Berisha, në një konferencë për mediat, tha se u shpërndanë si shpërblim 40 euro për 164 mijë persona me aftësi ndryshe dhe për mijëra kujdestarë të tyre.
“Ka shpërndarë për 164 mijë persona me aftësi ndryshe, dhe për mijëra e mijëra kujdestarë të tyre që në total shkojnë rreth 200 mijë, ka shpërndarë si shpërblim 4 mijë lekë apo 40 euro”, deklaroi Berisha.
Ai thekso se vendimi ishte marrë në dhjetor, por e kanë zbatuar në fushatën elektorale.
Berisha: Krimi elektoral i Edi Ramës nuk ka të ndalur. Ai ka përdorur pagesat për personat me aftësi ndryshe në kulmin e fushatës elektorale për të blerë vota.
Ka shpërndarë për 164 mijë persona me aftësi ndryshe, dhe për mijëra e mijëra kujdestarë të tyre që në total shkojnë rreth 200 mijë, ka shpërndarë si shpërblim 4 mijë lekë apo 40 euro.
Një vendim, të cilin e kanë marrë në dhjetor, por e kanë zbatuar pikërisht atëherë kur nuk mund të zbatohej, e kanë zbatuar në fushatën elektorale.
Solla këto shembuj për të ilustruar cinizmin ekstrem dhe pashpirtësinë e narkoqeverisë, e cila ndonëse i lë në kushte më të mjera, ju e patë, pensioni në Shqipëri është 60 përqind më i ulët se sa në vendin me pensionin më të ulët në Europë.
Dhe në vend se të ishte ndjekur politika e rritjes së pensioneve, e vendosjes së minimumit jetik, ndiqet praktika e shpërblimit për votë si për pensionistët, ashtu edhe për 200 mijë persona me aftësi të kufizuar dhe kujdestarët e tyre.
Dënoj dhe njëherë me forcën më të madhe këtë farsë të shëmtuar zgjedhore dhe deklaroj se PD kurrë nuk do të njohë, nuk do ta pranojë.
Do bëjë gjithçka që shqiptarët të votojnë si qytetarë të lirë.
