Turizmi i livandos në Spanjë 'pushton' fshatin: Mbi 100,000 vizitorë vetëm në korrik, autoritetet kërkojnë kufizime

Nga OraNews Përditësimi i fundit 29 Korrik 2025, 16:17

Fushat spektakolare të livandos në Brihuega të Spanjës kanë tërhequr më shumë se 100,000 vizitorë vetëm gjatë muajit korrik, duke kthyer këtë komunitet të vogël rural në një destinacion viral të mediave sociale dhe një qendër të paparashikuar turizmi.

Rreshtat e gjata të livandos me ngjyrë vjollcë, që shtrihen deri në horizont, janë kthyer në sfondin perfekt për Instagram-in, duke rritur ndjeshëm interesin ndaj qytetit të vogël në provincën e Guadalajarës.

Me rreth 1,000 hektarë të mbjellë me livando dhe një popullsi më të vogël se 3,000 banorë, Brihuega ka përjetuar një bum turistik që ka ndikuar drejtpërdrejt në rritjen e popullsisë me 24 për qind dhe një injektim prej 8 milionë eurosh në ekonominë rajonale.

Megjithatë, ky sukses nuk ka ardhur pa pasoja.

Rrugicat e ngushta të qytetit janë bllokuar nga automjete të parkuara pa rregull, ndërsa banorët janë detyruar të përballen me turma të mëdha vizitorësh, veçanërisht gjatë fundjavave.

Kryetari i bashkisë, Luis Viejo, ka apeluar që turistët të vizitojnë gjatë ditëve të javës për të shmangur mbingarkesën. “Fundjavat janë më të vështira për shkak të numrit të madh të njerëzve që vijnë. Të shtunën e kaluar, fshati u shemb”, tha ai për gazetën spanjolle ABC.

Ai shtoi se bashkia po planifikon ndërtimin e një parkingu në periferi të qendrës historike dhe vendosjen e një linje autobusësh për të menaxhuar më mirë fluksin.

Ndërsa hyrja në fushat e livandos mbetet e lirë dhe nuk aplikohet asnjë taksë turistike, autoritetet lokale po shqyrtojnë zgjidhje afatgjata për të kufizuar ndikimin e turizmit masiv mbi komunitetin.

Në këtë kuadër, po promovohen edhe destinacione të tjera sezonale, si fushat e sumakut në vjeshtë, për të shpërndarë turizmin gjatë gjithë vitit dhe për të lehtësuar ngarkesën gjatë muajve të verës.

Pavarësisht sfidave logjistike, livandoja ka sjellë një rilindje ekonomike e sociale në Brihuega, duke e kthyer këtë qytet të qetë në një shembull të suksesshëm të turizmit rural të bazuar në natyrë dhe estetikë. Sfida tani mbetet: si të ruhet kjo arritje pa e mbingarkuar komunitetin që e bëri të mundur?