Zelensky: Ukraina do të rrisë prodhimin vendas të armëve për t'iu kundërvënë forcave ruse
Nga OraNews Përditësimi i fundit 17 Korrik 2025, 19:36
Ukraina ka nisur një plan ambicioz për të shtuar ndjeshëm prodhimin vendas të armëve në përpjekje për të përballuar ofensivën ruse dhe për të ulur varësinë nga ndihmat e jashtme, ndërkohë që rritet pasiguria për dërgesat e ardhshme nga vendet perëndimore.
Presidenti Volodymyr Zelenskyy deklaroi të enjten në parlamentin ukrainas se qeveria e re synon që brenda gjashtë muajve, të paktën 50% e armëve që përdor ushtria të prodhohen brenda vendit, krahasuar me 40% aktualisht.
Ndërkohë, në një zhvillim të rëndësishëm, Zvicra njoftoi se Departamenti Amerikan i Mbrojtjes ka informuar autoritetet e saj për devijimin e një porosie të sistemeve të mbrojtjes ajrore Patriot, me qëllim që ato të përdoren për të përballuar nevojat urgjente të Ukrainës.
Nuk është ende e qartë nëse këto raketa do të dërgohen drejtpërdrejt në Ukrainë apo do të zëvendësojnë sisteme në shtete të tjera evropiane, të cilat do të kontribuojnë me donacione për Kievin.
Ambasadori amerikan në NATO, Matthew Whitaker, theksoi se përpjekjet për furnizimin e Ukrainës me armë janë duke përparuar me shpejtësi, por pa një datë të saktë për përfundimin e tyre.
Ai nënvizoi se kapacitete të reja prodhuese në SHBA do të vihen në dispozicion të aleatëve për të mbështetur më tej Ukrainën.
Në këtë linjë, Sekretari britanik i Mbrojtjes, John Healey, dhe homologu i tij gjerman, Boris Pistorius, do të zhvillojnë një takim të posaçëm të aleatëve të Ukrainës të hënën, me pjesëmarrjen e Sekretarit amerikan të Mbrojtjes, Pete Hegseth, dhe udhëheqësit të NATO-s, Mark Rutte.
Ata do të diskutojnë planet për përmbushjen e premtimeve të bëra nga Presidenti Donald Trump, i cili ka konfirmuar dërgimin e sistemeve Patriot përmes NATO-s.
Gjenerali Alexus Grynkewich, Komandant Suprem i Forcave Aleate të NATO-s për Evropën, deklaroi se përgatitjet janë në zhvillim për zhvendosjen e armëve drejt Ukrainës dhe se bashkëpunimi me Gjermaninë është shumë i ngushtë.
Në të njëjtën kohë, Shefi i NATO-s, Mark Rutte, deklaroi nga Uashingtoni se po koordinohet mbështetje e gjerë nga aleatë si Gjermania, Finlanda, Norvegjia, Suedia, Danimarka, Holanda dhe Kanadaja, me angazhime konkrete për të forcuar kapacitetet mbrojtëse të Ukrainës.
Presidenti Zelenskyy konfirmoi gjithashtu në Konferencën e Rimëkëmbjes së Ukrainës në Romë se Gjermania do të financojë dy sisteme Patriot, ndërsa Norvegjia do të furnizojë një të tretë, duke shtuar përpjekjet për të forcuar mbrojtjen ajrore të vendit përballë sulmeve të përditshme ruse me dronë dhe raketa.
