Denaj: Bletarët e bashkuar përfitojnë 100% mbështetje financiare
Nga OraNews Përditësimi i fundit 10 Korrik 2025, 13:20
Qeveria adreson mbështetje të veçantë për zhvillimin e sektorit të bletarisë përmes skemës së subvencionimit.
Në Skemën Kombëtare të Mbështetjes në Bujqësi 2025, bletaria mbështetet në vlerën 1000 lekë për zgjua dhe bletarët e bashkuar në një grupim fermerësh, përfitojnë të parët 100% financimin duke marrë secili prej tyre në llogari të veçantë masën e subvencionuar në nivelin maksimal.
Bletari Enkeled Mira, nga Devolli, prej gati 20 vitesh i përkushtuar në mbarështimin e bletëve, është përfitues i Skemës Kombëtare të Mbështetjes për bletarinë, e cila i ka mundësuar zgjerimin e aktivitetit të tij.
Rreth 200 koshere bletësh janë pjesë e një aktiviteti të qëndrueshëm bletarie që furnizon konsumatorët dhe tregun vendas me mjaltë cilësor dhe qumësht blete.
Ministrja e Bujqësisë dhe Zhvillimit Rural, Anila Denaj ndau historinë e tij në rrjete sociale teksa bëri të ditur për instrumente të reja financimi në mbështetje të bujqësisë dhe të fermerëve.
“Përmes Skemës Kombëtare të Investimeve, me 50% grant dhe mbështetjes nga Kredia e Butë të kombinuar me Garancinë Sovrane, çdo fermer mund të përfitojë financim me normë interesi vetëm 2% dhe mbulim kolateral deri në 70%”, tha Denaj.
Bletaria është një nga sektorët e rëndësishëm të ekonomisë, e cila ka pasur një zhvillim të konsiderueshëm në vitet e fundit.
Sot numërohen rreth 500 mijë zgjoje bletësh në të gjithë vendin, ku vetëm në 10 vitet e fundit numri i zgjojeve është rritur me 64%, duke ndikuar ndjeshëm në sasinë e prodhimit të mjaltit për tregun dhe për eksport në vendet e rajonit.
