Ministri i Jashtëm gjerman viziton fshehurazi Odessën për arsye sigurie/ Kërkon më shumë mbështetje për mbrojtjen ajrore të Ukrainës
Nga OraNews Përditësimi i fundit 1 Korrik 2025, 19:47
Ministri i Jashtëm gjerman Johannes Vandeful vizitoi të hënën portin e Odesës në jug të Ukrainës, duke u zotuar t'i nxisë aleatët t'i sigurojnë Kievit sisteme të mëtejshme të mbrojtjes ajrore. Ministri udhëtoi drejt qytetit të Detit të Zi me rrugë tokësore nga Kievi vetëm me një delegacion të vogël për arsye sigurie, pasi porti është një objektiv kryesor i sulmeve me raketa dhe dronë nga Rusia.
Vandeful shoqërohej nga homologu i tij ukrainas, Andriy Sibikha. Për shkak të kërcënimit të sulmeve të synuara ruse, vizita u mbajt sekret derisa Vandeful u nis për në Moldavinë fqinje. Ministri i Jashtëm gjerman tha se do t'i kërkonte Kancelarit Friedrich Merz dhe Ministrit të Mbrojtjes Boris Pistorius të bënin presion mbi aleatët që t'i siguronin Ukrainës më shumë sisteme të mbrojtjes ajrore për të sprapsur sulmet ruse.
Vandeful tha se ishte e nevojshme të vazhdohej t'u bëhej thirrje Shteteve të Bashkuara që të qëndronin të përkushtuara për mbrojtjen e Ukrainës. Gjermania gjithashtu duhet të përgatitet për faktin se do të thirret të bëjë më shumë, tha ai, duke theksuar sistemet që mund të instalohen në anijet ukrainase për të mbrojtur korridoret detare.
"Është e nevojshme të përqendrohemi në sigurimin e të gjitha furnizimeve të mundshme në fushën e mbrojtjes ajrore", tha Vandeful.
Vizita e Vandeful në Odessa erdhi një ditë pas vizitës së tij të parë në kryeqytetin ukrainas që nga marrja e detyrës në maj. Ai premtoi bashkëpunim të ngushtë në mbrojtje midis Gjermanisë dhe Ukrainës. Gjermania është një nga mbështetëset kryesore të Ukrainës në përpjekjet e vazhdueshme mbrojtëse të vendit kundër agresionit rus. Me rreth 1 milion banorë, Odessa është qyteti i tretë më i madh i Ukrainës pas Kievit dhe Kharkivit.
