Francë/ Spe*ma e donatorit me mutacion të rrallë gjenetik u përdor për të ngji*ur 67 fëmijë, 10 prej tyre u diagnostikuan me kancer
Nga OraNews Përditësimi i fundit 25 Maj 2025, 09:18
Sperma e një burri që përmbante një mutacion të rrallë që shkakton kancer u përdor për të ngjizur të paktën 67 fëmijë.
Mësohet se 10 nga këta fëmijë janë diagnostikuar me kancer, çka ka ngritur shqetësime në lidhje me mungesën e kufizimeve të dakorduara ndërkombëtarisht për përdorimin e spermës së donatorëve.
Ekspertët kanë paralajmëruar më herët për rreziqet sociale dhe psikologjike të përdorimit të spermës nga një donator i vetëm për të lindur një numër të madh fëmijësh në vende të ndryshme.
Rasti i fundit, që përfshin dhjetëra fëmijë të lindur midis viteve 2008 dhe 2015, ngre shqetësime të reja në lidhje me vështirësitë e gjurmimit të kaq shumë familjeve kur identifikohet një problem serioz mjekësor.
Rasti doli në dritë kur dy familje kontaktuan në mënyrë të pavarur klinikat e fertilitetit, pasi fëmijët e tyre zhvilluan kancer që dukej se lidhej me një variant të rrallë gjenetik.
Banka Evropiane e Spermës, e cila kishte furnizuar spermën, konfirmoi se varianti në një gjen të quajtur TP53 ishte i pranishëm në disa nga spermatozoidët e donatorit.
Ky variant i rrallë nuk dihej të ishte i lidhur me kancerin në kohën e dhurimit, në vitin 2008.
Ai nuk mund të zbulohej me teknikat standarde të shqyrtimit, dhe dhuruesi është në gjendje të mirë shëndetësore.
Megjithatë, analiza e kryer nga laboratori i Kasperit arriti në përfundimin se mutacioni kishte shumë të ngjarë të shkaktonte sindromën Li-Fraumeni, një nga predispozitat trashëgimore më serioze për zhvillimin e kancerit.
Një numër departamentesh të gjenetikës dhe pediatrisë në mbarë Evropën kanë nisur hetimet për rastet e tyre, duke çuar në ekzaminimin e 67 fëmijëve nga 46 familje në tetë vende evropiane.
Varianti u zbulua te 23 prej fëmijëve, 10 nga të cilët janë diagnostikuar me kancer, përfshirë raste të leuçemisë.
