Trump: Do të takohem me Putinin sa më shpejt të jetë e mundur
Nga OraNews Përditësimi i fundit 16 Maj 2025, 13:55
Presidenti amerikan, Donald Trump, i cili e ka mbajtur të ndezur situatën për një takim me Vladimir Putinin ditët e fundit, tha sot se do të takohej me presidentin rus “sa më shpejt të jetë e mundur”, por specifikoi se do të kthehej menjëherë në Uashington.
“Do ta bëja, do të isha gati të largohesha nga këtu për të shkuar atje”, shtoi presidenti amerikan në një shkëmbim të shkurtër me gazetarët, në fund të një vizite zyrtare në Emiratet e Bashkuara Arabe.
Megjithatë, ai shtoi se po kthehej në Shtetet e Bashkuara siç ishte planifikuar dhe mezi priste të takonte djalin që sapo kishte lindur vajza e tij, Tiffany Trump.
Një ditë më parë, Donald Trump kishte siguruar se “asgjë nuk do të ndodhte” në Ukrainë derisa të takohej me homologun e tij rus.
Presidenti amerikan më parë kishte lënë të kuptohej se do t’i bashkohej bisedimeve që po zhvillohen në Turqi për një zgjidhje të konfliktit në Ukrainë nëse Vladimir Putin do ta vizitonte vendin, siç kishte kërkuar presidenti ukrainas Volodymyr Zelensky.
Megjithatë, udhëheqësi rus nuk udhëtoi për në Stamboll, ku sot po zhvillohen negociatat e para të drejtpërdrejta midis Rusisë dhe Ukrainës që nga javët e para të luftës së shkaktuar nga pushtimi rus në vitin 2022.
Presidenti amerikan, i cili beson se ka një marrëdhënie të veçantë me homologun e tij rus, megjithatë, kohët e fundit ka treguar disa shenja zhgënjimi me të, ndërsa marrëdhëniet e tij me Volodymyr Zelensky duket se janë ngrohur disi.
Miliarderi republikan premtoi t’i jepte fund konfliktit në Ukrainë sa hap e mbyll sytë, sapo të bëhej përsëri president.
Bisedimet për armëpushim, siç pritej, rezultuan shumë më të vështira nga sa kishte parashikuar ai.
