Prokurorja e Përgjithshme e SHBA-së bën deklaratën: Trump mund të pushojë së qeni president pas këtij mandati
Nga OraNews Përditësimi i fundit 6 Prill 2025, 21:08
Prokurorja e Përgjithshme e Shteteve të Bashkuara, Pam Bondi, ka shprehur mendimin se presidenti aktual, Donald Trump, mund të pushojë së qeni president pas këtij mandati. Kjo deklaratë erdhi gjatë një interviste për Fox News, ku Bondi diskutoi mundësinë që Trump të kërkonte një mandat të tretë.
Trump ka përmendur më herët mundësinë për të kërkuar një mandat të tretë, duke sugjeruar se "nuk po tallej" me këtë ide, madje duke lënë të kuptohet se ka "metoda" për të arritur këtë, pavarësisht se Kushtetuta e SHBA-së e ndalon një gjë të tillë. Kjo ka ngritur dyshime dhe ka tërhequr vëmendjen e shumë analistëve dhe politikanëve.
Në përgjigje të këtyre spekulimeve, Bondi tha: "Do të doja ta kishim atë si president për 20 vjet, por mendoj se ai ndoshta do të pushojë së qeni president pas këtij mandati." Ajo e konsideroi një mundësi të largët ndryshimin e Kushtetutës për të lejuar një mandat të tretë për Trump, duke theksuar se amendamenti i 22-të është një barrierë e fortë.
Amendamenti i 22-të i Kushtetutës, i ratifikuar në vitin 1951, përcakton se asnjë person nuk mund të zgjidhet president më shumë se dy herë. Pavarësisht disa propozimeve nga disa individë për të ndryshuar këtë ligj, përfshirë një kongresmen republikan nga Tenesi që paraqiti një propozim për të ndryshuar "dy herë" në "tre", mundësia e ndryshimit të Kushtetutës duket e pamundur.
Propozimi duhet të votohet nga dy të tretat e Kongresit dhe të miratohet nga të paktën 38 shtete, një procedurë që Bondi e vlerësoi si shumë të vështirë për t'u realizuar.
Në aspektin ligjor, administrata Trump ka shënuar disa fitore, duke përfshirë një vendim të fundit nga Gjykatën e Lartë të SHBA-së. Në këtë rast, gjykata vendosi të anulojë një urdhër gjykate që kërkonte ndalimin e ngrirjes së bursave të Departamentit të Arsimit për rreth 64 milionë dollarë, duke e konsideruar si pjesë të luftës së administratës kundër programeve të diversitetit dhe barazisë.
"Ne sapo morëm një fitore të madhe dhe do të vazhdojmë të luftojmë çdo ditë," tha Bondi, duke theksuar rëndësinë e fitores në këtë betejë ligjore. Gjykata e Lartë gjithashtu rivendosi një urdhër gjykate që kërkonte rifillimin e pagesave të detyruara ndaj agjencive ndërkombëtare të ndihmës, me një vlerë që varionte nga 1.5 miliardë deri në 2 miliardë dollarë.
Kjo fitorja e fundit është një tjetër pasqyrim i ndikimit të administratës Trump në Gjykatën e Lartë, ku shumica e gjyqtarëve janë të emëruar nga presidenti Trump gjatë mandatit të tij të parë.
