Rutte kërkon llogaridhënie nga Serbia për s*lmet në Banjskë dhe ndaj KFOR-it në Kosovë
Nga OraNews Përditësimi i fundit 2 Prill 2025, 19:33
Sekretari i Përgjithshëm i NATO-s, Mark Rutte, ka deklaruar se Serbia duhet të angazhohet në llogaridhënie për sulmet në Banjskë dhe për sulmet ndaj ushtarëve të KFOR-it në veri të Kosovës.
Ai theksoi se situata e sigurisë në Kosovë është një çështje shumë e rëndësishme për aleancën, dhe se stabiliteti i rajonit duhet të ruhet në mënyrë të qëndrueshme që nga viti 1999.
"Sulmet në Banjskë dhe ndaj forcave të NATO-s në vitin 2023 janë të papranueshme. Serbët duhet të punojnë në llogaridhënie për këto incidente," ka thënë Rutte gjatë një deklarate për mediat para takimit të ministrave të jashtëm të shteteve anëtare të NATO-s. Ai ka shtuar se ka diskutuar këto çështje me Presidentin e Serbisë, Aleksandar Vučić, dhe se ka pasur biseda të mëtejshme për këto ngjarje edhe gjatë një darke në Bruksel.
Rutte gjithashtu ka theksuar se lufta në Ukrainë nuk do të ketë ndikim në stabilitetin e Ballkanit Perëndimor, veçanërisht në kontekstin e forcave paqeruajtëse. Misionet e NATO-s në Kosovë dhe Bosnjë, sipas tij, janë të rëndësishme për ruajtjen e sigurisë dhe paqes në rajon.
Në lidhje me memorandumet e arritura mes Kosovës, Shqipërisë dhe Kroacisë, Rutte ka përmendur se këto marrëveshje janë të rëndësishme për stabilitetin rajonal dhe se ato janë arritur jashtë kornizave të NATO-s, duke theksuar rolin e bashkëpunimit të ngushtë midis shteteve të Ballkanit Perëndimor.
