BE propozon etiketim të ri për verërat pa dhe me pak alkool
Nga OraNews Përditësimi i fundit 28 Mars 2025, 16:38
Komisioni Evropian ka propozuar tre emërtime të reja të standardizuara për verërat pa dhe me pak alkool (NoLo), në një përpjekje për të rritur tërheqjen e tyre dhe për të harmonizuar etiketimin në të gjithë Bashkimin Evropian.
Sipas paketës së re të verërave, BE-ja synon të zëvendësojë termat teknikë aktualë me klasifikime më miqësore për konsumatorët:
• “Pa alkool” për verërat me përmbajtje alkooli deri në 0.5%,
• “0.0%” për verërat me më pak se 0.05% alkool,
• “Alkool i lehtë” për verërat me alkool mbi 0.5%, por të paktën 30% më të ulët se niveli standard i kategorisë përkatëse.
Komisioneri i BE-së për Bujqësinë, Christophe Hansen, deklaroi se ky propozim synon të ndihmojë prodhuesit e verës të shfrytëzojnë mundësitë e tregut dhe të përmbushin pritshmëritë e konsumatorëve për produkte me përmbajtje më të ulët alkooli.
Kërkesa për verëra NoLo ka ardhur në rritje, duke ndjekur suksesin e industrisë së birrës në këtë segment. Në vitin 2023, tregu global i pijeve NoLo arriti vlerën e 13 miliardë dollarëve, një rritje prej 62% që nga viti 2018.
Përveç standardizimit të terminologjisë, paketa e re përfshin edhe masa për rritjen e fleksibilitetit të mbjelljeve të vreshtave, rregullimin e marketingut, mbështetje për qëndrueshmërinë klimatike dhe promovimin e turizmit të verës.
Propozimi tani pritet të diskutohet nga eurodeputetët në Parlamentin Evropian në prill, ku Komisioni shpreson për një miratim të shpejtë të masave.
