“Gërdeci”, shtyhet seanca ndaj ish-ministrit Mediu. Zamira Durda: Kam 17 vite që pres drejtësi
Nga Edison Vatnikaj Përditësimi i fundit 25 Mars 2025, 09:48
Shtyhet për në datë 7 prill seanca gjyqësore në ngarkim të ish-ministrit të Mbrojtjes Fatmir Mediu lidhur me procesin “Gërdeci”.
Shkak u bë mungesa e tij i cili kishte një ftesë në Kongresin Amerikan nga data 24 mars deri në datën 1 prill.
Sipas avokatit Henrik Ligori, Mediu duhet të jetë vetë i pranishëm për të paraqitur komentet mbi akt-ekspertimin tekniko-ushtarak.
Ndërkohë, avokati i familjarëve Dorian Matlia kërkoi që pretendimet të paraqiten njëherë me shkrim për ekonomi gjyqësore.
Prokurori Klodian Braho e quajti të pajustifikuar mungesën e Fatmir Mediut dhe kërkoi të vazhdonte seanca në prani të mbrojtësit të tij ligjor, gjë që u kundërshtua nga ky i fundit.
Gjyqtarja Irena Gjoka vendosi të shtyjë seancën duke i tërhequr vëmendjen Mediut, që mungesa të kësaj natyre nuk do të konsiderohen më në seancat e ardhshme.
Në seancë ishte e pranishme edhe Zamira Durda, e cila tha që ka 17 vjet që pret drejtësi.
