Ripërdorimi social i pasurive të konfiskuara, Xhaja: Forcojmë rritjen e transparencës

Nga OraNews Përditësimi i fundit 12 Shkurt 2025, 16:52

Kryeadministratorja e Agjencisë së Administrimit të Pasurive të Sekuestruara dhe Konfiskuara, Risena Xhaja ishte e pranishme në panelin e parë të diskutimeve të Konferencës Ndërkombëtare “Nga fitimet e paligjshme te e mira publike: e ardhmja e aseteve të konfiskuara”.

Konferenca e organizuar nga “Partners Albania” mblodhi bashkë përfaqësues të agjencive shtetërore përgjegjëse për administrimin e pasurive të sekuestruara dhe të konfiskuara, ekspertë të huaj dhe vendas, si edhe aktorë të shoqërisë civile.

Kryeadministratorja e AAPSK, Xhaja, gjatë diskutimeve në konferencë u shpreh se pavarësisht sfidave ligjore dhe operacionale gjatë kryerjes së detyrave të saj, Agjencia ka arritur të shtojë të ardhurat nga mirëadministrimi i pasurive të sekuestruara dhe konfiskuara.

Ripërdorimi social i pasurive të konfiskuara, Xhaja: Forcojmë

Xhaja theksoi se nevojiten përmirësime të mëtejshme ligjore, të cilat duhet të synojnë një kuadër rregullator më të plotë dhe të detajuar për administrimin dhe ripërdorimin e pasurive të konfiskuara.

Sa i përket sfidave operacionale, kryeadministratorja e AAPSK përmendi burimet e kufizuara njerëzore dhe financiare. “Administrimi i pasurive të konfiskuara është shpesh një proces i ndërlikuar, që kërkon ekspertizë dhe pajisje të specializuara. Agjencia duhet të qëndrojë e përditësuar me praktikat më të mira dhe zhvillimet teknologjike për të siguruar një menaxhim efikas,” u shpreh Xhaja.

Kryeadministratorja vlerësoi mbështetjen e Komitetit Ndërinstitucional për Masat kundër Krimit të Organizuar, si organi mbikëqyrës për veprimtarinë e AAPSK dhe që merr vendime të rëndësishme sa i përket përdorimit efektiv të pasurive të sekuestruara dhe konfiskuara.

Për të rritur efektshmërinë e ripërdorimit të pasurive të konfiskuara për përfitime sociale, AAPSK ka identifikuar disa prioritete dhe mekanizma qe duhet të forcohen, duke nisur nga përmirësimi i kapaciteteve të Agjencisë, burimet njerëzore, infrastruktura dhe teknologjia, forcimi i mekanizmave të transparencës dhe llogaridhënies, nxitja e mëtejshme e bashkëpunimeve dhe partneriteteve me institucionet e tjera shtetërore dhe organizatat e shoqërisë civile.

Xhaja theksoi gjithashtu nevojën e krijimin e mekanizmave efektivë të monitorimit dhe vlerësimit, si edhe rritjen e informimit dhe përfshirjes më të gjerë të publikut në lidhje me rëndësinë e ripërdorimit të pasurive të konfiskuara për qëllime sociale.