Bankat në sistemin e BE-së, Sejko i mbledh në takim: Bëni gati teknologjinë
Nga OraNews Përditësimi i fundit 9 Janar 2025, 15:50
Në nisje të vitit të ri Guvernatori Gent Sejko ka mbledhur drejtorët e bankave të nivelit të dytë ku i ka kërkuar të plotësojnë kriteret për tu bërë pjesë e sistemit të BE. Me këtë anëtarësim ai tha se transfertat drejt unionit do të realizohen me një kohë të shpejtë dhe se komisionet do të ulen ndjeshëm
Guvernatori i Bankës së Shqipërisë, Gent Sejko, gjatë një takimi me drejtues të bankave, ka kërkuar plotësimin e kushteve për t’u bërë pjesë në sistemin e bankave të BE.
Në njoftimin për mediet thuhet se ai kërkoi angazhimin e plotë në këtë proces duke rikujtuar edhe njëherë përfitimet që pritet të kenë shqiptarët nga ulja e komisioneve në transfertat jashtë vendit dhe shpejtësia e realizimit të tyre.
Një tjetër çështje e diskutuar mes palëve ishte edhe kreditimi i ekonomisë që ka qenë burimi kryesor i mbështetjes së ekonomisë me fonde, për të cilen Sejko kërkoi sistemit bankar të tregojë kujdes me qëllim për të ruajtur një stabilitet financiar në vend.
Në përfundim, Sejko u shpreh se transformimi digjital, mbetet i një rëndësie të veçantë për sektorin bankar. Bankat duhet të vazhdojnë të investojnë në teknologji për të përmirësuar përvojën e klientit, për të adresuar sfidat e sigurisë kibernetike.
