UNIFIL akuzon Izraelin për shkelje të armëpushimit, ndërsa Hezbollahu humbet durimin

Nga OraNews Përditësimi i fundit 5 Janar 2025, 11:03

Forcat paqëruajtëse të OKB-së në Liban akuzuan Izraelin të shtunën, për një "shkelje flagrante" të rezolutës së Këshillit të Sigurimit të vitit 2006, që përbën bazën e armëpushimit të nëntorit me Hezbollahun.

Deklarata nga Forca e Përkohshme e OKB-së në Liban (UNIFIL), erdhi ndërsa udhëheqësi i Hezbollahut Naim Qassem paralajmëroi se durimi i grupit militant me shkeljet izraelite mund të mbarojë, përpara përfundimit të afatit kohor 60-ditor të zbatimit të armëpushimit.

Armëpushimi i brishtë, i cili hyri në fuqi më 27 nëntor, është karakterizuar nga akuza të ndërsjella për shkelje nga të dyja palët.

“Këtë mëngjes, paqeruajtësit vëzhguan një buldozer [ushtarak izraelit] që shkatërronte një fuçi blu që shënonte vijën e tërheqjes midis Libanit dhe Izraelit në Labbouneh, si dhe një kullë vëzhgimi që i përkiste Forcave të Armatosura Libaneze pranë një pozicioni UNIFIL atje,” tha forca paqeruajtëse.

“Shkatërrimi i qëllimshëm dhe i drejtpërdrejtë i [ushtarakëve] të pronave dhe infrastrukturës së UNIFIL, të identifikueshme qartë që i përkasin Forcave të Armatosura Libaneze, është një shkelje flagrante e Rezolutës 1701 dhe ligjit ndërkombëtar.”

Forca, e cila përfaqësohet në panelin që mbikëqyr zbatimin e armëpushimit, u bëri thirrje "të gjithë aktorëve të shmangin çdo veprim, duke përfshirë shkatërrimin e pronës civile dhe infrastrukturës, që mund të rrezikojë ndërprerjen e armiqësive".

Sipas kushteve të armëpushimit, ushtria libaneze do të vendoset së bashku me paqeruajtësit e OKB-së në jug, ndërsa ushtria izraelite tërhiqet gjatë një periudhe 60-ditore.

Hezbollahu do të tërheqë forcat e tij në veri të lumit Litani -- rreth 30 kilometra (20 milje) nga kufiri -- dhe do të çmontojë çdo infrastrukturë ushtarake të mbetur në jug.

Në fund të dhjetorit, forcat paqeruajtëse të OKB-së shprehën shqetësimin për dëmin "vazhdues", të shkaktuar nga ushtria izraelite në Libanin jugor.

Duke detajuar sulmet e saj të fundit ajrore në Liban të enjten, ushtria izraelite tha se po vepronte për të hequr çdo kërcënim ndaj Izraelit, "në përputhje me mirëkuptimet e armëpushimit".

Qassem tha se Hezbollahu kishte vendosur të tregonte durim, por paralajmëroi se kjo nuk do të zgjasë pafundësisht.

“Ne kemi thënë se po japim një mundësi për të parandaluar shkeljet izraelite dhe për të zbatuar marrëveshjen dhe do të tregojmë durim”, tha ai, duke theksuar: “Kjo nuk do të thotë se do të presim 60 ditë”.

“Udhëheqja e rezistencës përcakton se kur të ushtrojë durim, kur të marrë iniciativën dhe kur të përgjigjet,” tha ai.