BRAZIL – Raste skllavërie në kantieret kineze të prodhimit të makinave BYD
Nga OraNews Përditësimi i fundit 27 Dhjetor 2024, 12:54
Në Brazil, një task-forcë e përbërë nga prokurori i punës, policia federale dhe organe të tjera shpëtuan 163 punëtorë kinezë që ishin në kushte të ngjashme me skllavërinë, në kantieret e ndërtimit të fabrikës së makinave elektrike të kompanisë kineze, BYD, në Camaçari, në shtetin e Bahias.
Punëtorëve, duke përfshirë saldatorët, muratorët dhe ngarkuesit, u kërkohej të punonin 10 orë në ditë, gjashtë ditë në javë, pa ditë pushimi të detyrueshme.
Sipas raportit të task-forcës, të paktën katër raste të amputimit të gjymtyrëve dhe humbjes së lëvizjes së gishtit kanë ndodhur në fillim të dhjetorit.
Gjiganti global në tregun e makinave elektrike tani po përballet me pyetje në lidhje me përgjegjësinë e tij për menaxhimin e punës dhe respektimin e të drejtave të punonjësve.
Ndërtimi i fabrikës filloi këtë vit, pasi CEO i Byd Brasil Tayler Li u takua me presidentin Luiz Inácio Lula da Silva në janar. Në atë kohë, kompania njoftoi një investim prej tre miliardë reais (rreth 466 milionë euro) dhe synimin për të prodhuar 150 000 makina në vit në uzinën e Bahias.
