Mosvendosja e pankartave me urimin 'Gëzuar Krishtlindjet', reagon kisha katolike në Shkodër

Nga OraNews Përditësimi i fundit 17 Dhjetor 2024, 15:42

Kisha katolike në Shkodër ka reaguar në lidhje me një lajm pas një reagimi publik në Facebook, të Famullitarit të Kishës Katolike të Shkodrës, Dom Vlash Palaj, ku i bënte thirrje kryebashkiakut Benet Beci, t’i shërbejë komunitetit pjesë e të cilit është edhe ai katolik dhe të vendosë sa më parë në vendet e duhuna publike, pankartat me urimin ‘Gëzuar Krishtlindjen dhe Vitin e Ri 2025!’

DEKLARATË

Zoti Ju dhashtë Paqe.

Sapo u zgova në mëngjes, pas Meshës së Shenjtë, lexova në media që “Kisha Katolike” kishte kritikuar Bashkinë Shkodër dhe Kryetarin e saj për vonesën në vendosjen e parullës me mesazhin e urimit për festën e Krishtlindjes në qendër të qytetit.

Së pari ju bëj me dije se Kisha Katolike në Shkodër përfaqësohet nga Shkëlqësia e Tij Imzot Angelo Massafra dhe jo nga Dom Vlash Palaj, famullitari, i cili ka postuar statusin në media sociale, dhe nga asnjë Meshtar tjetër, pa autorizimin e Arqipeshkvit.

Për këtë arsye: Unë distancohem nga kjo mënyrë veprimi.

Së dyti ndjej një keqardhje të thellë për përdorimin e këtij statusi nga media dhe individë të ndryshëm, për qëllimet e tyre personale apo politike.

Fatkeqësisht përdorimi i këtij statusi nga mediat ka krijuar një atmosferë jo të përshtatshme në prag të festës së Krishtlindjes.

Shfrytëzoj rastin të falenderoj publikisht Bashkinë Shkodër për bashkëpunimin e veçantë për organizimin e Luminit të Martirëve të fesë Dom Gjon Gazulli dhe Atë Luigi Paliq.

Dëshiroj t’ju kujtoj gjithashtu, se në vitet e kaluara parullat me urimin për festat, janë prodhuar dhe vendosur nga vetë Komunitetet Fetare, me një leje të posaçme nga Bashkia. Propozoj që nga viti 2025 e në vazhdim të ndiqet e njëjta praktikë.

Të nderuar, lus dhe uroj që kjo deklaratë të shërbejë për të qetësuar situatën, dhe të vlerësojmë festën e Krishtlindjes për të qenë, siç thotë Papa Françesku “Artizanë të paqes”.

Zoti na bekoftë!

+ Angelo Massafra OFM
Arqipeshkëv Metropolit i Shkodër-Pult