Irani kritikon rezolutën e IAEA-s, rriten tensionet mbi programin bërthamor
Nga OraNews Përditësimi i fundit 22 Nëntor 2024, 13:11
Agjencia Ndërkombëtare e Energjisë Atomike (IAEA) rriti presionin e saj ndaj Iranit, duke miratuar një rezolutë që kërkon përgjigje për pyetjet e pazgjidhura në lidhje me programin bërthamor të Teheranit.
Bordi i Guvernatorëve të agjencisë me bazë në Vjenë miratoi një rezolutë duke i ngarkuar kreut të agjencisë Rafael Grossi për të paraqitur një raport të detajuar mbi çështjet që lidhen me aktivitetet bërthamore të Iranit.
Teherani e dënoi shpejt rezolutën, me ministrinë e Jashtme dhe Organizatën iraniane të Energjisë Atomike që lëshuan një deklaratë të përbashkët të enjten në mbrëmje.
Ata e përshkruan rezolutën si “të motivuar politikisht” dhe shkatërruese, duke akuzuar mbështetësit e saj perëndimorë se e përdorin atë si një pretekst për të çuar përpara “objektivat politikisht të paligjshme” kundër Iranit.
Si kundërmasë, Irani njoftoi planet për të futur “një koleksion të madh” centrifugash të avancuara për të përshpejtuar pasurimin e uraniumit.
Uraniumi i pasuruar shumë është thelbësor për ndërtimin e kokave bërthamore, por Irani këmbëngul se nuk ka ndërmend të ndjekë armët bërthamore.
Inspektorët e IAEA kanë kohë që kërkojnë përgjigje nga Teherani për gjurmët bërthamore që mund të tregojnë për objekte të padeklaruara ose aktivitete sekrete në të kaluarën.
