Zyra e Keir Starmer: Doktrina e re bërthamore ruse, produkt i një ‘qeverie të shthurur’
Nga OraNews Përditësimi i fundit 19 Nëntor 2024, 14:37
Zëdhënësi zyrtar i kryeministrit të Mbretërisë së Bashkuar Keir Starmer e ka përshkruar regjimin e presidentit Vladimir Putin si një “qeveri të shthurur ruse” pasi presidenti rus nënshkroi një doktrinë të re bërthamore për Federatën Ruse të martën.
Në doktrinë, Rusia thotë se do ta trajtojë “agresionin nga çdo shtet jo-bërthamor, por me pjesëmarrjen ose mbështetjen e një vendi bërthamor” si një sulm që mund të meritojë një përgjigje bërthamore, shkruan The Guardian, transmeton Gazeta Express.
Zëdhënësi i Doëning Street, i cili tradicionalisht mbetet anonim, por flet në emër të kryeministrit, tha:
“Do të ishte e drejtë të thuhet se është shembulli i fundit i papërgjegjshmërisë që kemi parë nga qeveria e shthurur ruse.
Ne mbetemi të palëkundur në mbështetjen tonë për Ukrainën dhe mbrojtjen nga pushtimi i paligjshëm dhe gjithmonë kemi thënë se mbrojtja e Britanisë së Madhe fillon në Ukrainë.
Ne jemi shumë të qartë se Vladimir Putin mund t’i japë fund kësaj lufte nesër. Ai mund të largonte trupat e tij, të kthente tanket e tij dhe t’i jepte fund sulmit dhe gjakderdhjes së panevojshme si në Ukrainë ashtu edhe në Rusi.
Kjo është tërësisht në dorë të tij. Ne do ta nxisnim atë ta bënte këtë”.
Putin urdhëroi ndryshime në doktrinën bërthamore në javët para zgjedhjeve në SHBA.
Të martën në mëngjes, zëdhënësi i Kremlinit Dmitry Peskov tha se përdorimi i raketave perëndimore jo-bërthamore nga forcat e armatosura ukrainase kundër Federatës Ruse sipas doktrinës së re mund të çojë në një përgjigje bërthamore, duke kërkuar që doktrina e re bërthamore duhet të bëhet objekt i analizës së thellë jashtë vendit.
Peskov tha se përditësimi i doktrinës ishte i nevojshëm për ta sjellë dokumentin në përputhje me situatën aktuale politike.
