Dy priftërinj akuzohen për vjedhjen e 3 milionë eurove nga arkat e Kishës, i investojnë në lokale nate
Nga OraNews Përditësimi i fundit 24 Tetor 2024, 16:42
Kisha Katolike e Greqisë po përballet me një skandal të madh, pasi autoritetet kanë nisur një hetim mbi dy priftërinj të lartë, të akuzuar se kanë përvetësuar rreth 3 milionë euro nga arkat e Kishës dhe i kanë investuar në lokale nate.
Sipas mediave helene, këto fonde janë zhdukur nga llogaritë e Kishës dhe janë përdorur për të financuar biznese të dyshimta. Presidenti i Autoritetit Kundër Pastrimit të Parave ka urdhëruar ngrirjen e llogarive bankare dhe pasurive të pesë pronarëve të klubeve të natës, duke u mbështetur në gjetjet e tij që u paraqitën në organin kompetent të akuzës.
Hetimet kanë zbuluar se situata ka nisur tetë vite më parë, me lëvizje të mëdha parash nga llogaritë e dy priftërinjve drejt llogarive të pronarëve të disa klubeve të natës, duke u shfaqur si investime. Alarmi u ngrit nga banka, e cila identifikoi këto lëvizje të dyshimta, çka çoi në veprime nga autoritetet ligjzbatuese.
Autoriteti Kundër Pastrimit të Parave ka konfirmuar se këto fonde janë përvetësuar nga fondet e Kishës, duke e çuar hetimin drejt dy priftërinjve dhe disa biznesmenëve të përfshirë në këtë skandal.
Kjo situatë ka ngjallur shqetësim të gjerë në opinionin publik dhe ka hedhur hije dyshimi mbi besueshmërinë e institucioneve të Kishës në Greqi. Skandali po përballet me një vëmendje të madhe mediatike dhe debat në shoqërinë greke, duke nxitur thirrje për transparencë dhe reformë brenda Kishës.
