BILANCI/ Balluku: Mbi 8.2 milionë pasagjerë nga Rinasi në 9 muaj, në 2025 dorëzojmë aeroportin e Vlorës.Dorëzuam 44.5 km rrugë në vitin 2024
Nga OraNews Përditësimi i fundit 12 Tetor 2024, 12:06
Zëvendëskryeministrja Belinda Balluku, njëherësh ministre e Infrastrukturës dhe Energjisë informoi sot se në 9-mujorin e parë të vitit 2024 në aeroportin ndërkombëtar “Nënë Tereza” u përpunuan 8 250 000 pasagjerë, ose 53.7% më shumë se një vit më parë.
Në konferencën e organizuar në përmbylljen e sezonit turistik veror 2024, Balluku vlerësoi se flukset e turistëve ishin të paparashikueshme dhe kanë tejkakuar pritshmëritë e vendosura në fillim të vitit.
Duke folur për flukset e regjistruara në aeroportin ndërkombëtar “Nënë Tereza”, Balluku theksoi se kemi pasur një rritje eksponenciale nga viti në vit për të arritur rritjen me 53.7% në 9-mujorin e parë të këtij viti.
Po ashtu, Balluku theksoi se për të njëjtën periudhë, në aeroportin e Rinasit u përpunuan
53 320 avionë ose 44.5% më shumë krahasuar me vitin 2023.
Balluku tha se parashikimet për numrin e pasagjerëve deri në fund të vitit janë 10.4 milionë pasagjerë, ndërsa shprehu bindjen se edhe kjo shifër do të tejkalohet.
“Parashikojmë që viti të mbyllet me 69 mijë fluturime, të cilat janë të shpërndara gjatë vitit në mënyrë të barabartë, jo si në vitin 2022 që sezoni niste në fund të qershorit. Në një ditë të vetme në aeroportin e Rinasit u regjistruan 45 100 pasagjerë”, shtoi ajo.
Po ashtu, Balluku theksoi se ka pasur rritje të numrit të destinacioneve të reja nga 109 destinacione të reja në drejtim të Europës në vitin 2023, këtë vit ka pasur 136 destinacione të reja.
“Viti 2025 do të ketë një sërë risish në infrastrukturë, por më e rëndësishmja është dorëzimi i Aeroportit të Vlorës, duke i dhënë Shqipërisë një nga aeroportët më të mëdhenj në rajon me pistë të kategorisë E, 3.2 km të gjatë. Presim të kemi edhe udhëtime transoqeanike që nuk do të limitojnë numrin e turistëve që vijnë”, tha ajo.
Ajo bëri të ditur sot se gjatë këtij viti janë dorëzuar 44.5 km rrugë të reja, që janë autostrada të kategorisë A.
Në konferencën e zhvilluar në përmbylljen e sezonit turistik veror, Balluku theksoi se këtë vit u hap rruga Thumanë-Kashar për përdorimin e të gjithë drejtuesve të automjeteve.
“Nga mbrëmja e 28 qershorit deri në 30 shtator, në aksin Thumanë-Kashar kanë kaluar 2 milionë e 700 mijë automjete, shifër rekord edhe për autostradat e tjera të rajonit”, tha ajo.
Ndërkohë Balluku theksoi se nga tuneli i Llogorasë i cili u hap në 5 korrik, kanë kaluar deri në 30 shtator 715 198 automjete.
“Këto shifra janë përgjigjja e vetme për të gjithë ata që vazhdojnë baltosin një vend që po lulëzon në rang botëror për sa i përket industrisë së turizmit dhe që ka vëmendjen e plotë të të gjitha medieve ndërkombëtare”, tha Balluku.
Po ashtu, Balluku theksoi se janë bërë të disponueshme një sërë aksesh turistike si ai Palasë-Dhërmi apo Orikum-Dukat.
“Do të vazhdojmë edhe me lidhjen e Orikum-Dukat me tunelin e Llogorasë, apo vazhdimi i rrugës së Jugut, që e kemi premtuar”, tha ajo.
Balluku theksoi po ashtu se ka ende shumë punë përpara si hapja e garës ndërkombëtare për një tjetër segment të Korridorit Blu, atë Milot-Balldren, një segment shumë i pritur nga gjithë pjesa e veriut të vendit.
AKTIVITETI I PLOTE PER TURIZMIN
