Zhupa: Projektligji i ri për shkencën garanton shkatërrimin dhe centralizimin nga politika të kërkimit shkencor

Nga OraNews Përditësimi i fundit 5 Tetor 2024, 17:35

Deputetja Ina Zhupa, kryetare e Komisionit të Edukimit denoncon projektligjin e ri që do diskutohet në komisionin që ajo drejton nga data 14 Tetor si shkatërrimtar për shkencën. Duke u nisur edhe nga përjashtimet masive për 40 ditë, edhe të Znj. Zhupa vetë, që ka bërë mazhoranca, do të kalohet ky ligj me shpejtësi pa diskutimet e duhura.

Projekligji sipas saj krijon një ministri të shkencës që do fusi në kontrollin politik dhe kërkimin shkencor dhe do shkatërroj lirinë dhe autonominë universitare. Znj. Zhupa fton ti bashkohen me kundërshtimin e këtij projektligji edhe pedagogët, akademikët e lirë, kërkuesit shkencor dhe drejtuesit e universiteteve publike dhe private.

Statusi i plotë:

Projektligji i ri i shkencës garanton shkatërrimin e kërkimit shkencor duke e centralizuar dhe kontrolluar nga politika dhe duke e vënë në shërbim të pushtetit.

Një ministri e re për shkencën, një këshill me 7 ministra, Gjinushin dhe të tijët dhe me agjenci shtetërore do kontrollojnë çdo profesor, cdo kërkues shkencor dhe çdo punim shkencor në vend.

Po zhdukin cdo autonomi universitare, po zhveshin nga kompetencat profesorët, departamentet, shkollat doktorale dhe po e monopolizojnë te qeveria.

Vetëm në sistemet parti-shtet, ndodh sic e ka parashikuar ky ligj që vlerësimin e punës shkencore e bën ministria, dmth e bën partia shtet. Nuk ka financim po nuk i pëlqeu qeverisë, nuk ka kërkim shkencor që kundërshton politika të caktuara ekonomike, sociale, bujqësore, teknologjike etj.

Ky ligj parashikohet që të futet në diskutim në 14 Tetor në komisionin që une drejtoj, të Edukimit, por tashmë që na kanë përjashtuar pa rregullore, duket se do e kalojnë me shpejtësi pa opozitën, për të shkatërruar edhe lirinë shkencore dhe akademike.

Ju bëj thirrje pedagogëve, akademikëve të lirë, kërkuesve shkencor, drejtuesve të universiteteve publike dhe private të bashkohemi kundër këtij projektligji masakrues për lirinë akademike dhe përcundues të kërkimit shkencor cilësor dhe të pavarur.