Departamenti i Drejtësisë së SHBA-së nis trajnimin e 15 hetuesve të AMP-së: Më shumë llogaridhënie nga policia
Nga OraNews Përditësimi i fundit 23 Shtator 2024, 16:43
Departamenti i Drejtësisë i SHBA, ICITAP, në partneritet me Agjencinë Shqiptare të Mbikëqyrjes Policore (AMP), ka nisur një kurs tre javor për hetimin e krimit për 15 hetues të AMP në Ministrinë e Brendshme.
Përmes një postimit në rrjetet sociale, Ambasada Amerikanë në Tiranë, bën me dije se kursi synon të rrisë aftësitë e Oficerëve të Policisë Gjyqësore dhe të zbatimit të ligjit në hetimin e krimeve, duke përmbushur standardet kombëtare.
“Ambasada e SHBA është krenare që mbështet këtë nismë për më shumë llogaridhënie nga policia në rrugën drejt integrimit në BE”, thuhet më tej në reagim.
Postimi i plotë:
Sot, më 23 shtator, Departamenti i Drejtësisë i SHBA – ICITAP, në partneritet me Agjencinë Shqiptare të Mbikëqyrjes Policore (AMP), nisi një kurs trijavor për hetimin e krimit për 15 hetues të AMP në Ministrinë e Brendshme.
Ky program, i konceptuar për herë të parë në vitin 2022, synon të rrisë aftësitë e Oficerëve të Policisë Gjyqësore dhe të zbatimit të ligjit në hetimin e krimeve, duke përmbushur standardet kombëtare.
I mbështetur nga zyrtarë të lartë në qeverinë e Shqipërisë, ky kurs ka trajnuar tashmë mbi 160 oficerë dhe vazhdon të krijojë kapacitete në zbatimin e ligjit në Shqipëri.
Ambasada e SHBA është krenare që mbështet këtë nismë për më shumë llogaridhënie nga policia në rrugën drejt integrimit në BE.
