Kush është Ismail Zeneli që u soll sot nga Spanja? Historia e hakmarrjes me vëllezërit Nela dhe roli i tij në trafikun e drogës nga Brazili dhe Ekuadori
Nga OraNews Përditësimi i fundit 23 Gusht 2024, 09:50
Më 2 dhjetor të vitit 2023, “Ora News" raportoi arrestimin e anëtarit të bandës së trafikut të drogës ku pjesë e saj janë Ervin Mata dhe djali i Erzen Breçanit, Eralb Breçani.
Gazetari Elton Qyno bënte me dije në atë kohë se bëhet fjalë për Isamil Zenelin, i cili ishte arrestuar në Spanjë.
Ismail Zeneli është dhe njeriu që kërkonte të vriste me Bujar Gërmizin, Dedan Gjonin dhe Nuredin Dumanin dy vëllezërit Nela.
Vëllezërit Edmond dhe Albert Nela, dhe djathtas shefi i krimeve të Komisariatit nr. 6 në kryeqytet, Dedan Gjoni
Arrestimi nga autoritet spanjolle kanë ardhur pas kërkesës së SPAK-ut për lokalizimin dhe ndalimin e tij.
Zeneli është arrestuar për qëllime të ekstradimit të tij në Shqipëri, një ekstradim që u njoftua mëngjesin e kësaj të premteje.
KONFLIKTI ME VËLLEZËRIT NELA
Albert dhe Edmond Nela janë dy vëllezërit që kërkoheshin të vriteshin nga Bujar Gërmizi dhe personat e tjerë.
Albert dhe Edmond Nela
Ismail Zeneli, i cili më herët ka pasur emrin Luan Sadria dyshohet se porositi vrasjen e dy vëllezërve Albert e Edmond Nela, të cilët jetojnë në Britaninë e Madhe.
Dy vëllezërit Nela dyshohet se në vitin 2013 në Britaninë e Madhe kishin vrarë Guximtar Sadrinë, vëllain e Luan Sadrisë, i cili atje kishte emrin Xhem Krasniqi.
Në foto: Xhem Krasniqi (Ismail Zeneli)
Në shenjë hakmarrjeje, ai kërkon eliminimin e tyre dhe këtë e merr përsipër Bujar Gërmizi, i arrestuar nga policia me urdhër të SPAK që goditi një grup kriminal pas zbërthimit të aplikacionit “Sky”.
Në kuadër të këtij operacioni u arrestua Dedan Gjoni, oficer policie dhe Erzen Breçani, ish-zyrtar i Policisë së Shtetit, si dhe u shpall në kërkim Ervin Mata, djali i Erzen Breçanit, Eralbi Breçani, si dhe u shpallën në kërkim disa persona të tjerë.
Sipas dosjes hetimore, Dedan Gjoni kryen veprime aktive duke ndjekur motrën dhe nënën e dy vëllezërve, tenton t’ju vërë GPS në makinë, ndërsa nxjerr nga sistemi TIMS të dhënat për Albert dhe Edmond Nelën.
Vrasja nuk realizohet, pasi nuk arrijnë t’i gjejnë vendndodhjen e dy vëllezërve.
Ndërkohë, Ismail Zeneli rezulton person kyç në trafikun e drogës nga Brazili dhe Ekuadori në drejtim të vendeve të BE-së dhe bashkëpunon ngushtë me Eralbi Breçanin.
