VIDEO+EMRAT/ U tradhtuan nga hija, ja kush janë dy hajdutët që vodhën varësen
Nga OraNews Përditësimi i fundit 17 Gusht 2024, 12:43
Dy të rinj, të moshave 21 dhe 23 vjeç, Daniel Meçi dhe Luis Mija janë arrestuar nga policia në Tiranë, pasi i kanë vjedhur një gruaje varësen nga qafa dhe më pas u larguan me vrap.
Ngjarja ka ndodhur në zonën e “Rrugës së Elbasanit”, ndërsa blutë bëjnë me dije se në cilësinë e provës materiale u sekuestruan varësja e vjedhur, një aparat celular dhe veshjet që këta shtetas kanë përdorur gjatë kryerjes së vjedhjes.
“Shërbimet e Komisariatit të Policisë Nr. 1, pas marrjes së njoftimit se dy persona i kishin vjedhur varësen një shtetaseje, në Rrugën e Elbasanit, menjëherë kanë organizuar dhe finalizuar operacionin policor të koduar “Necklace”, për identifikimin dhe kapjen e autorëve të dyshuar.
Si rezultat i punës dhe veprimeve të shpejta hetimore, nga specialistët për Hetimin e Krimeve në Komisariatin e Policisë Nr. 1, u identifikuan, kapën dhe ndaluan shtetasit D. M., 23 vjeç, dhe L. M., 21 vjeç, të dy banues në Tiranë.
Këta shtetas, në bashkëpunim me njëri-tjetrin, më datë 15.08.2024, në Rrugën e Elbasanit, i kanë vjedhur varësen një shtetaseje dhe më pas janë larguar.
Në cilësinë e provës materiale u sekuestruan varësja e vjedhur, një aparat celular dhe veshjet që këta shtetas kanë përdorur gjatë kryerjes së vjedhjes”, njofton policia.
