Zgjedhorja pa reformë/ Nuri: Qëndrimi i PD i qartë, nuk u arrit të miratoheshin koalicionet parazgjedhore
Nga Lili Saraçi Përditësimi i fundit 26 Korrik 2024, 09:33
Sot pritet që Kuvendi të votojë dakordësinë mes mazhorancës dhe opozitës për ndryshimet në Kodin Zgjedhor që do t'i hap rrugë votës së diasporës dhe hapjes së listës në 2/3 e tyre.
Për të folur për këto zhvillime, i ftuar në një intervistë në "Ora News" nëpërmjet një lidhjeje në"Skype", ishte përfaqësuesi i PD në KQZ, Franc Nuri.
"Qëndrimi i Partisë Demokratike është mjaft i qartë. Nuk ka reformë zgjedhore, nuk ka pasur konsensus për reformë zgjedhore. Mazhoranca socialiste nuk është dakord për mjaft ndryshime në Kodin Zgjedhor, për të adresuar problematika si eleminimin e patronazhistëve, si heqjen e ndërhyrjeve të politikës në administratën publike dhe ndërhyrjet e administratës publike në zgjedhje, nuk kanë qenë dakord për rëndimin e ndëshkimeve dhe sanksioneve në Kodin Penal për personat që tentojnë të manipulojnë ose të tjetërsojnë votën e qytetarëve. Më e rëndësishmja që nuk u arrit të miratohej janë koalicionet parazgjedhore. Ky ishte kriteri numër një që Partia Demokratike kishte kërkuar për reformën zgjedhore dhe ky element as nuk u diskutua. Nuk ka reformë zgjedhore, por ka një detyrim të ardhur nga disa vendime të Gjykatës Kushtetuese që e kanë nxjerr Kodin Zgjedhor jashë loje për votën e emigrantëve dhe nga ana tjetër e kanë nxjerrë të pazbatueshëm Kodin Zgjedhor aktual për pjesën e llogaritjes së mandateve të deputetëve", tha Nuri.
