“Trump nuk dëmtohet”/ Verdikti kundër ish-presidentit rrit donacionet për republikanët, 141 mln dollarë në maj
Nga Katerina Hysenllari Përditësimi i fundit 4 Qershor 2024, 13:26
Ish-presidenti i Shteteve të Bashkuara Donald Trump dhe Komiteti Kombëtar i partisë Republikane mblodhën 141 milionë dollarë në maj. Këtë informacion drejtuesit e fushatës e kanë lidhur ndarë me publikun duke qenë të bindur se shpallja fajtor e Trump për 34 akuza nuk e ka dëmtuar atë.
Dënimi i ish-presidentit Donald Trump nga gjykata ka rritur mbështetjen financiare në garën e tij për Shtëpinë e Bardhë.
Në muajin maj, republikanët mblodhën 141 milionë dollarë donacione nga mbështetësit, gati dyfishi i bilancit të një muaji më parë. Donatorët dhanë mesatarisht 70,27 dollarë secili.
53 milionë dollarë u mblodhën vetëm në 24 orët kur juria e gjykatës së Nju-Jorkut shpalli ish-presidentin Tramp fajtor për falsifikimin e bilanceve të biznesit të tij për të paguar një aktore para fushatës së vitit 2016, që të mos tregonte lidhjen e tyre intime të dikurshme. Tramp e ka mohuar akuzën.
Në një deklaratë për shtyp, Komiteti i Partisë Republikane tha se rritja e donacioneve tregon se publiku amerikan e ka kuptuar "gjyqin maskaradë të Bidenit".
Në muajt e fundit, ekipi i presidentit Joe Biden ka mbledhur më shumë fonde nga simpatizuesit e demokratëve, por në prill Trumpi e kaloi për herë të parë me 76 milionë dollarë.
Zgjedhjet presidenciale në SHBA do mbahen më 5 nëntor. Sondazhet tregojnë se presidenti aktual Biden ka një avantazh prej 2 pikë përqindje ndaj rivalit Trump, rezultat që është brenda marzhit të gabimit.
