Lautaro Martinez, më i miri i SERIA A/ Dusan Vlahoviç shpallet sulmuesi më i mirë i sezonit në Itali

Nga Klaudio Pulaj Përditësimi i fundit 25 Maj 2024, 11:59

Seria A ka ndarë çmimet për protagonistët e këtij sezoni. Kështu, kapiteni i Interit, Lautaro Martinez u shpall lojtari më i mirë për këtë edicion, ndërsa Dushan Vllahoviç i Juventusit, si sulmuesi më i mirë në Itali.

Siç është bërë traditë tashmë, Seria A italiane ka bërë të ditur emrat e protagonistëve kryesor, që spikatën në këtë edicion, duke ndarë çmimet për lojtarët më të mirë.

Nuk ishte si të ndodhte ndryshe, teksa kapiteni i Interit Lautaro Martinez fitoi çmimin si futbollisti më i mirë i ligës për sezonin 2023-2024.

Bomberi i zikaltërve zhvilloi një sezon fantastik, duke u shpallur edhe golashënuesi më i mirë me 24 realizime, duke ndihmuar skuadrën e Simone Inzaghit të dominojë kampionatin italian dhe të shpalleshin kampion.

Në ceremoninë e ndarjes së çmimeve, Dusan Vlahoviç i Juventus-it u shpall sulmuesi më i mirë i sezonit, falë 16 golave të tij, duke numëruar këtu edhe 4 asiste.

Serbi ndihmoi bardhezinjtë të fitonin Kupën e Italisë dhe të siguronin pjesëmarrjen në Champions League.

Ndërkaq, tek ekipi kampion nuk mund të mungonin edhe emra të tjerë, të cilët u vlerësuan për paraqitjen mbresëlënëse të këtij sezoni.

Kështu, Hakan Calhanoglu u vlerësua si mesfushori më i mirë i vitit në Seria A. Turku ka kontriubuar për Inter-in me 13 gola dhe 3 asiste.

Sakaq, Alessandro Bastoni fitoi çmimin si mbrojtësi më i mirë. 25-vjeçari ishte pika kyçe e Inter-it, që tregoi mbrojtjen më solide dhe të fortë në Itali.

Çmimin si portieri më i miri e mori gardiani i Monzas, Michele Di Dregorio, i cili me pritjet e tij tepër deçizive ndihmoi ekipin të grumbullonte shumë pikë.

Joshua Zirkze u shpall lojtari më i mirë, për moshën deri në 23-vjeç, falë paraqitjeve dhe golave me fanellën e Bologna-s, në këtë edicion të elitës së futbollit italian.