Ushtria amerikane: Mbi 569 tonë ndihma humanitare dorëzohen në Rripin e Gazës
Nga OraNews Përditësimi i fundit 21 Maj 2024, 14:18
Mbi 569 tonë ndihma humanitare janë dorëzuar në Rripin e Gazës përmes një skele të përkohshme të ndërtuar nga SHBA-ja, njoftoi sot ushtria amerikane.
Porti i përkohshëm po shërben si një qendër për dërgimin e furnizimeve me ndihma për të përmbushur nevojat urgjente të popullit palestinez pasi vetë Gaza nuk ka një port mjaft të bollshëm për anije mallrash më të mëdha.
Dërgesat e ndihmës së parë mbërritën të premten në territorin bregdetar të prekur nga konflikti.
Komanda Qendrore e SHBA-së (CENTCOM) tha sot në një postim në platformën e mediave sociale X, se deri më tani në Gazë kanë mbërritur 569 tonë ndihma humanitare përmes skelës, nga donatorë, përfshirë SHBA-në, Britaninë e Madhe, Emiratet e Bashkuara Arabe dhe Bashkimi Evropian.
“Skela është një zgjidhje e përkohshme për të rritur ndihmën humanitare në Gazë për të përmbushur nevojat urgjente të popullit palestinez”, sipas postimit.
Gazeta “Times of Israel” raportoi se sasia e ndihmave korrespondon me rreth 25 kamionë të ngarkuar me ndihma.
Sipas deklaratave të mëparshme të Pentagonit, rreth 90 kamiona në ditë fillimisht do të arrijnë në Rripin e Gazës përmes skelës lundruese. Në një fazë të mëvonshme, priten deri në 150 ngarkesa kamionësh në ditë.
Mungesa e furnizimeve bazë ka çuar në një krizë humanitare në Rripin e Gazës, mbi 7 muaj pas fillimit të luftës midis Izraelit dhe Hamasit.
