REPORTAZHI/ Fiter Bajrami në Romë
Nga Alba Kepi Përditësimi i fundit 12 Prill 2024, 14:19
Dita e Fiter Bajramin 2024 në Romë i ngjan një pikture frymëzuar nga një shpërthim ngjyrash.
Në Xhaminë e Madhe pozicionuar fare pranë Vatikanit, kostume tradicionale të të gjitha kulturave mbretërojnë këtë ditë feste.
Prindër, fëmijë, të rinj, të moshuar e të gjithë emigrantë nga Pakistani, Afrika, India, Ballkani, Kosova, Shqipëria, Egjipti, Siria, Turqia, banorë të Romës e rrethinave kanë mbërritur qysh herët për të kryer faljen e kësaj dite të shenjtë pas muajit të madhërueshëm të Ramazanit.
Xhami e Romës është vendi kult më i madh në Itali për besimtarët myslimanë e një nga xhamitë më të mëdha të Europës.
Në 30 mijë metra katrorë territor të saj, janë pozicionuar qysh herët me dhjetëra forca policie që patrullojnë çdo rrugë e rrugicë në harkun rrethues të xhamisë për të garantuar sigurinë e rendin publik në këtë ditë feste për besimtarët myslimanë.
Imami i kësaj xhamie thotë se në faljen e shentjë janë programuar 4 orare për të mundësuar hyrjen e të gjithë besimtarëve.
Me veshjet e tyre më të bukura që i ngjanë kostumografisë së një filmi hollivudianë të epokës, besimtarët kryejnë ritin e faljes e më pas në grupe urojnë e përqafojnë njëri-tjetrin.
Mes tyre dëgjon të flasin dhe shqip. Janë shqiptarë të Shqipërisë, Kosovës, Maqedonisë.
Gjen në Xhaminë e Madhe të Romës dhe jetë shqiptare.
Një familje nga Kuçova tregojnë se jetojnë në Romë prej shumë vitesh e në Xhaminë e Madhe vijnë e falen çdo ditë feste bashkë me fëmijët e tyre. Janë dy vogëlushë pak vjeçarë të veshur si një dasmë shqiptare që luajnë me njëri-tjerin buzë bordurës së shatërvanit qendror të Xhamisë.
Një grup kosovarësh nga Kosova, rrëfejnë se kanë shtruar disa iftarë me miq, të njohur, italianë e të kombësive të ndryshme, gjatë këtij muajit të bekuar të Ramazanit.
Ndërsa dy të rinj nga Maqedonia e Veriut tregojnë se në qytezën ku ata jetojnë pak kilometra larg Romës, ka sipërmarrës shqiptarë që bëjnë bamirësi e ndihmojnë mjaft persona qoftë shqiptarë, të huaj apo italianë, i punësojnë por dhe kontribuojnë në punë gratis për të kryer punime në ambientet publike të vendbanimit.
Një nënë shqiptare me bashkëshortin e verbër nën krah thotë se dëshira e saj më e madhe është të jetojnë me shëndet këtë rrugëtim jete.
Xhamia e Romës është ndërtuar të mikëpresë deri në 12 mijë besimtarë e sot duket se të gjithë janë aty. Imami i saj Nader Akkad, thotë se ne ditë të tilla ajo vizitohet nga rreth 40 mijë besimtarë.
Pas lutjes në oborrin plot jeshillëk, shatërvanë e lule, grupe besimtarësh kryejnë fotografitë e rastit e më pas ulen mbi bar e shtrojnë si në një piknik fshati një drekë me gatimet më të mira tradicionale të kulturës së tyre.
Të fotografosh këtë moment është si të sodisësh një pikturë frymëzuar nga një shpërthim ngjyrësh.
Veshjet e vajzave e grave afrikane, indiane, pakistaneze, siriane, afgane, shkëlqejnë nga bizhuteritë e trupit e stolive të kokës, ndërsa në kostumet tradicionale të burrave mbizotëron ngjyra e bardhë e shamitë në ngjyra të ndryshme sipas kombësive që u veshin kokat e qafën.
FOTO/ 5 destinacione për fundjavat e pranverës
12 Prill, 13:34
Xhamia e Madhe e Romës është hapur më 21 qershor 1992 e janë dashur plot 10 vite për ndërtimin e saj.
Ka një arkitekturë tipike esenciale islamike me trarë e harqe që evokojnë modelin e një xhamie pyll, karakteristike e xhamisë otomane, persiane, spanjolle me një alternim hapësirash nga ato të mëdhat në ato të ngushta e të vogla.
Elementet dekorative janë pllakat e qeramikës në ngjyra delikate jeshile, blu nate e të bardhë ndësa mbishkrimi Allahu është drita mbizotëron ambiente e saj.
Xhamia e Romës u sposorizua nga mbreti saudita Fayṣal ibn ʿAbd al-ʿAzīz Āl Saʿūd.
Arkitekt i saj ishte italiani Paolo Portoghesi e gjatë ndërtimit të saj u përdorën materiale ndërtimi si gurë, mermer e qeramikë tipike italiane.
Xhamia e Madhe e Romës është një Qendër e Kulturës Islamike në Itali e një vend simbol i dialogut institucional me autoritetet italiane jo pak herë komunimet zyrtare të saj kanë qenë një rrugëtim dialogu e bashkëjetese në momente të vështira të panoramës ndërkombëtare.
Në Itali jetojnë rreth 2 milionë besimtarë myslimanë e Fiter Bajrami u kremtua dhe në qytete e komuna të tjera, vende Kulti e në Qendra të kulturës islamike.
