“IS”, kërcënim për Irakun!/ SHBA: Misioni i koalicionit nuk ka mbaruar! “Rusia” tregoi se duhet mundur kudo
Nga OraNews Përditësimi i fundit 25 Mars 2024, 14:44
SHBA, vlerësojnë se Shteti Islamik ende përbën kërcënim për Irakun dhe misioni i koalicionit global për të mposhtur terroristët ende nuk ka përfunduar! Qëndrimi vjen nga përfaqësuesja e Uashigtonit në Bagdad, e cila thotë se sulmi në Rusi tregoi se ISIS është armik i përbashkët që duhet mposhtur kudo në botë!
Shteti Islamik ende përbën një kërcënim në Irak dhe puna e koalicionit ushtarak të udhëhequr nga SHBA me Irakun për të mposhtur plotësisht grupin nuk ka përfunduar, tha në një intervistë për Reuters ambasadorja e Shteteve të Bashkuara në Irak, Alina Romanowski.
Politikanë të lartë irakianë, përfshirë kryeministrin Mohammed Shia al-Sudani, kanë thënë vazhdimisht se grupi nuk përbënte më një kërcënim në Irak dhe koalicioni nuk ishte i nevojshëm, edhe pse filialet e tij vazhduan të kryenin sulme diku tjetër.
Por përfaqësuesja e SHBA vlerëson ndryshe!
“Shteti Islamik është ende një kërcënim këtu, shumë, shumë i zvogëluar, por megjithatë puna jonë në thelb nuk është kryer dhe ne duam të sigurojmë që forcat irakiane mund të mundin ISIS", tha diplomatja.
Deklarata vjen pasi dega afgane e Shtetit Islamik , ISIS-K, mori përgjegjësinë për sulmin e së premtes në një koncert rock pranë Moskës, në të cilin u vranë 137 njerëz.
“Siç na kujton kjo ngjarje, ISIS është një armik i përbashkët terrorist që duhet mposhtur kudo”, tha ajo në një koment shtesë pas intervistës për Reuters
Javën e kaluar, të paktën tre persona vdiqën në një sulm vetëvrasës të kryer nga ISIS-K në Afganistan dhe në janar ajo mori përgjegjësinë për një sulm vetëvrasës të dyfishtë në Iran, i cili ndan një kufi prej 1,600 km me Irakun.
Kryeministri i Irakut do të takohet me Presidentin e SHBA-së Joe Biden në Uashington më 15 prill për të diskutuar të ardhmen e koalicionit ndërkombëtar anti terrorizëm dhe çështje të tjera të bashkëpunimit!
Ndërsa misioni i koalicionit është të këshillojë dhe ndihmojë forcat irakiane në luftën kundër Shtetit Islamik, zyrtarët perëndimorë thonë se SHBA dhe aleatët e saj e shohin gjithashtu praninë e saj në Irak si një kontroll mbi ndikimin Iranian në rajon!
