Shkarkimi i Albana Fico, reagon kryetarja e Komisionit të Shëndetësisë: Nuk mbulohet skandali i Urgjencës me masa gjysmake
Nga OraNews Përditësimi i fundit 25 Mars 2024, 13:03
Kryetarja e Komisionit te Shendetesise Zheni Gjergji ka reaguar për shkarkimin e Albana Ficos.
Gjergji shprehet se nuk mbulohet skandali i Urgjencës me masa gjysmake.
Postimi i plote:
Nuk mbulohet skandali i Urgjencës me masa gjysmake.
Prej ditës së parë kur Urgjenca e QSUT u përshi nga flakët ku u bë shkrumb një investim prej 17 milionë eurosh i taksapaguesve shqiptarë, kemi ngritur zërin e kemi kërkuar hetim, transparencë e përgjegjësi para ligjit.
Pas disa javësh heshtje dhe errësirë, qeveria vendosi të largojë Drejtuesen e QSUT.
Këto janë masa gjysmake për shfaqje.
Qeveria duhet të tregojë çfarë ndodhi, pse ndodhi, si nuk u menaxhua si duhet ajo situatë?
Qeveria është përgjegjëse për paratë e çuara dëm, e sidomos për koston që kjo ka sjellë tek shëndeti i qytetarëve duke qënë se Urgjenca nuk funksionon prej muajsh tanimë.
Ky rast flagrant papërgjegjshmerie tregon raportin e vërtetë që rilindja ka me shëndetësinë, ku aferat e skandalet synon t'i zbehë me show e propagandë.
Opozita do ta kërkojë deri në fund të vërtetën për Urgjencën e çdo abuzim që është bërë në këtë sektor jetik.
