VIDEO/ AMERIKA MBRON TITULLIN - Shtetet e Bashkuara mposhtën Meksikën në CONCACAF
Nga Klaudio Pulaj Përditësimi i fundit 25 Mars 2024, 10:45
Shtetet e Bashkuara të Amerikës janë fituesit e Kupës së Amerikës Veriore dhe Qendrore. Ata mposhtën në finale Meksikën me rezultatin 2-0.
Shtetet e Bashkuara të Amerikës mbrojnë titullin, duke fituar Ligën e Kombeve të Amerikës Veriore dhe Qendrore, pasi mposhtën në finale Meksikën me rezultatin 2-0.
Kështu amerikanët ngrin lart trofeun e fituesit për të tretën herë radhazi, duke u bërë e para kombëtare që e bën një gjë të tillë në këtë kompeticion.
Finalja e madhe e këtij turne u mbajt në Arlington të Teksasit dhe vendasit e shfrytëzuan mjaft mirë faktorin fushë dhe përkrahjen e publikut të tyre.
Përballja u karakterizua nga duele të forta në fushën e blertë. Emocionet dhe spektakli nuk mungoi në sfidën mes dy përfaqësuese, që historikisht ka prodhuar një rivalitet të fortë dhe luftë sportive.
Amerikanët kontrolluan pjesën më të madhe të lojës, duke krijuar edhe më shumë raste të rrezikshme për shënim.
Këmbëngulja e djemve të Berhalter u shpërblye në fundin e pjesës së parë
Tejlër Adams i dha avantazhin SHBA-ve me një gol fantastik.
Në fraksionin e dytë meksikanët provuan të reagonin dhe të barazonin shifrat, por ishin të pafuqishëm të ndëshkonin portierin Tërner.
Goditjen Meksikën ia dha Xhovani Reina. Mesfushori i Dortmundit, por i lënë në huazim te Notingem Forest vulosi triumfin e Shteteve të Bashkuara.
Minutat e mbetura të lojës nuk sollën më ndryshim të rezultatit dhe festa është e gjitha e amerikanëve.
