Kurti përkujton Albright: Kosova gjithmonë mirënjohëse

Nga OraNews Përditësimi i fundit 23 Mars 2024, 23:54

Kryeministri i Kosovës, Albin Kurti përkujtoi sot ish-sekretaren amerikane të Shtetit, Madeleine Albright, në dyvjetorin e vdekjes.

Në një postim në rrjetin social X, Kurti shkruan se Kosova do të jetë gjithmonë mirënjohëse ndaj Albright për ndalimin e gjenocidit.

“Kanë kaluar dy vjet që nga vdekja e sekretares së Shtetit të SHBA-së, Madeleine Albright, një avokate e vendosur për vlerat amerikane jashtë vendit. Kosova do të jetë gjithmonë jashtëzakonisht mirënjohëse për përkrahjen e saj ndaj ndërhyrjes së NATO-s, e cila ndaloi krimet e papërshkrueshme të gjenocidit”, shkroi Kurti.

Madeleine Albright lindi në vitin 1937 dhe ishte gruaja e parë që mbajti postin e Sekretares së Shtetit. Ajo ishte një figurë kyçe në administratën e Bill Clinton dhe udhëhoqi politikën e jashtme të SHBA-së në periudhën e pas Luftës së Ftohtë.

Pasi ishte ambasadorja amerikane në OKB, në mandatin e dytë të Bill Clinton-it ajo ishte shefe e diplomacisë, ajo mbrojti zgjerimin e NATO-s dhe inkurajoi ndërhyrjen në Ballkan për të ndaluar gjenocidin dhe spastrimin etnik.

Ajo luajti një rol kyç në ndërhyrjen në Kosovë në vitin 1999 për të parandaluar gjenocidin ndaj shqiptarëve nga kasapi i Ballkanit Sllobodan Millosheviq.

Albright akuzoi Millosheviq për krijimin e “tmerrit të përmasave biblike” në dëshirën e tij për të zhdukur shqiptarët në Kosovë.

Mësimet e dhimbshme të nxjerra në Ruandë dhe në Bosnjë i shërbyen mirë SHBA-së në Kosovë kur serbët më të fuqishëm filluan spastrimin etnik të shqiptarëve.

Në vitin 1999, NATO u përgjigj me një fushatë 14-javore të sulmeve ajrore që përfshiu edhe Beogradin.