3 parti të minoriteteve, kërkesë komisionit të Reformës Zgjedhore: Përfaqësim në Parlament
Nga OraNews Përditësimi i fundit 18 Shkurt 2024, 12:24
Partia Aleanca e Maqedonasve për Integrimin Europian, Partia Aleanca për Barazi dhe Drejtësi Europiane dhe Partia për Europianizim dhe Integrim e Shqipërisë i janë drejtuar me një kërkesë komisionit të posaçëm të Reformës Zgjedhore, duke parashtruar shqetësimet dhe propozimet e tyre.
Sipas këtyre 3 partive politike, që përfaqësojnë dhe komunitetin maqedonas, vlleh rom dhe egjiptian, sistemi aktual nuk adreson nevojat e shoqërisë dhe nuk mundëson përfaqësim të drejtë për minoriteteve, të cilat janë të shpërndara në të gjithë territorin e Republikës së Shqipërisë.
“Në emër të partive të komunitetit maqedonas, vlleh rom dhe egjiptian në Shqipëri, veçanërisht partia Aleanca e Maqedonasve për Integrimin Europian, partia Aleanca për Barazi dhe Drejtësi Europiane dhe partia për Europianizim dhe Integrim e Shqipërisë, kërkojmë që Komisioni i Posaçëm për Reformën Zgjedhore të trajtojë rekomandimet e raporteve të OSBE/ODIHR-it, zbatimin e votimit dhe numërimit elektronik, administratë zgjedhore të depolitizuar dhe krijimin e kushteve për votimin e qytetarëve jashtë vendit”, thuhet në deklaratën për medie të 3 partive politike.
“Është thelbësore që Reforma Zgjedhore të zbatohet në një proces gjithëpërfshirës dhe konsensual dhe të adresojë çështjen e përfaqësimit të minoriteteve me vende të garantuara në parlament duke u siguruar atyre një zë të dëgjueshëm dhe efektiv. Kjo do të lejojë përfaqësuesit e tyre të mbrojnë dhe adresojnë në mënyrë efikase problemet e minoriteteve”, vijon deklarata.
“Sistemi zgjedhor aktual, proporcional rajonal, nuk adreson nevojat e një shoqërie të larmishme dhe të formacioneve sociale brenda saj.
Ky sistem është diskriminues dhe nuk garanton përfaqësim të drejtë për minoritetet, të cilat janë të shpërndara në të gjithë territorin e Republikës së Shqipërisë, jo vetëm në zona të veçanta”, bëhet me dije më tej.
Në deklaratën e ndarë për mediat, tre partitë politike, përfaqësuese të minoriteteve sjellin dhe shembullin e disa shteteve evropiane në këtë drejtim.
“Shumë shtete evropiane kanë adoptuar modele të suksesshme për përfaqësimin e minoriteteve në parlament, si në Kroaci, Slloveni, Rumani, Hungari, Kosovë, Federatën Ruse dhe vendet skandinave.
Këto shembuj duhet të shërbejnë si inspirim për ndryshime pozitive në sistemin tonë zgjedhor.
Përfaqësimi i minoriteteve në Parlament është jo vetëm një çështje e drejtësisë dhe barazisë, por edhe një detyrim që rrjedh nga konventat ndërkombëtare për mbrojtjen e pakicave kombëtare dhe standardet ndërkombëtare që trajtojnë të drejtat dhe liritë e minoriteteve.
Në veçanti, Opinioni i Pestë për Shqipërinë i Komitetit Këshillimor për Konventën Kuadër për Mbrojtjen e Pakicave Kombëtare të Këshillit të Europës në vitin 2023 kërkon nga Shqipëria të ndërmarrë masa pozitive për të siguruar përfaqësimin e minoriteteve në Parlament”, bëhet me dije në deklaratë.
“Ne besojmë se ndryshimet në legjislacionin tonë për përfaqësimin parlamentar të minoriteteve do të na rendisin në mesin e shteteve më të përparuara demokratike në Evropë në lidhje me përfaqësimin e grupeve minoritare.
Kjo është një mundësi për Shqipërinë të tregojë angazhimin e saj ndaj vlerave demokratike dhe respektimin e diversitetit”, përfundon deklarata e 3 partive politike.
