Dita më vdekjeprurëse për Izraelin, vriten 21 ushtarë në Gaza
Nga OraNews Përditësimi i fundit 23 Janar 2024, 13:16
Ushtria izraelite tha se 21 ushtarë të saj janë vrarë në Gaza, dita më vdekjeprurëse për forcat izraelite që nga fillimi i operacionit të tyre tokësor. Një zëdhënës i Forcave të Mbrojtjes të Izraelit (IDF), Daniel Hagari, tha se militantët e Hamas goditën me granatë një tank pranë dy ndërtesave.
Ai tha se ndërtesat shpërthyen ndoshta si rezultat i minave që forcat izraelite kishin vendosur atje për t’i shkatërruar ato. Sipas tij ushtarët, shumica e të cilëve ishin rezervistë, ishin përfshirë në një operacion për të lejuar banorët e Izraelit jugor të ktheheshin të sigurt në shtëpitë e tyre pasi dhjetëra mijëra u evakuuan pas sulmit të Hamasit më 7 tetor.
Izraeli nisi luftën me qëllimin për të shkatërruar Hamasin pas ata vranë 1,300 persona kryesisht civilë dhe morën peng rreth 250 të tjerë në sulmin e paprecedentë.
Të paktën 25,295 njerëz, kryesisht gra dhe fëmijë janë vrarë në fushatën ushtarake izraelite në Gaza që atëherë, sipas ministrisë së shëndetësisë të drejtuar nga Hamasi.
