Kina: Rekorde të reja të temperaturave të ulëta nga vala e ftohtë në vend

Nga OraNews Përditësimi i fundit 21 Dhjetor 2023, 13:07

Më shumë se 20 stacione në shumë rajone të vendit shënuan temperatura të ulëta historike për muajin dhjetor në orët e para të ditës së sotme.

Temperaturat e reja rekord të ulëta u vendosën sot në Kinë pasi vendi përballet me një valë të ftohtë të vazhdueshme që vjen në fund të një viti me mot ekstrem. Byroja Kombëtare Meteorologjike e Kinës njoftoi se më shumë se 20 stacione në shumë pjesë të vendit regjistruan temperatura historike të ulëta për muajin dhjetor në orët e para të ditës së sotme .

Kjo u regjistrua kryesisht në Hohhot, kryeqyteti i rajonit të Mongolisë së Brendshme në Kinën veriore , ku termometri ra deri në -29.1 gradë Celsius, duke thyer një rekord të vendosur gati 70 vjet më parë.

Autoritetet paralajmëruan për temperatura të ulëta në një zonë të gjerë në veri, lindje dhe juglindje të vendit.

Kjo valë e fortë e ftohtë vjen pas një viti të shënuar me vapë rekord dhe përmbytje shkatërruese, kryesisht në pjesën veriore të vendit.

Ekspertët paralajmërojnë se ndryshimet klimatike, të shkaktuara nga emetimet e gazrave serrë, po i bëjnë më të shpeshta këto ngjarje ekstreme të motit.

Byroja Kombëtare Meteorologjike kishte njoftuar dje, të mërkurën, se pesë stacione në vend kishin regjistruar rekorde të ftohta, duke përfshirë një temperaturë prej -33.2 në qytetin Datong, në Kinën veriore.

Në provincën Gansu, në pjesën veriperëndimore të vendit, ku një tërmet goditi të hënën që vrau më shumë se 130 njerëz, të mbijetuarit po kalojnë natën në tenda të mëdha të ngritura nga punonjësit e shpëtimit, duke u përpjekur të ngrohen nën batanije ndërsa jashtë temperaturat shumë të ulëta mbizotërojnë.