Të përfshirë në korrupsion, burg për ish-ministrin e Brendshëm polak dhe zëvendësin e tij
Nga OraNews Përditësimi i fundit 20 Dhjetor 2023, 22:04
Ish-ministri i Brendshëm polak Mariusz Kaminski, dhe një nga ish-zëvendësministrat e tij, Maciej Wąsik, u dënuan me dy vjet burg me akuzën për korrupsion.
Çështja në fjalë daton në periudhën kur PiS ishte partia e parë në pushtet nga viti 2005 deri në vitin 2007.
Në atë kohë Kaminski ishte kreu i Byrosë Qendrore Antikorrupsion (CBA).
Në vitin 2009, kur Kamiński ishte ende kreu i CBA-së, ai dhe tre nga vartësit e tij u akuzuan për tejkalim të kompetencave të tyre në një hetim për një skandal korrupsioni që kishte çuar në dorëheqjen e zëvendëskryeministrit Andrzej Lepper.
Çështja, e quajtur skandali i tokës nga media, kishte të bënte me pretendimet e bëra nga biznesmenët polakë se falë kontakteve të tyre në ministrinë e bujqësisë ata ishin në gjendje të ndryshonin statusin ligjor të çdo parcele toke në Poloni.
Në vitin 2015, disa javë pasi PiS erdhi në pushtet, presidenti Andrzej Duda e fali Kaminskin, i cili ishte shpallur fajtor për shpërdorim të pushtetit ndërsa shërbente si kreu i agjencisë kundër korrupsionit.
Falja e lejoi të bëhej ministër. Avokatët vunë në dyshim nëse Duda mund ta kishte falur Kaminskin përpara se një gjykatë të lëshonte një vendim përfundimtar në rastin e tij, ndërsa politikanët e opozitës kanë thënë se vendimi i tij ishte politik.
