Basha: Shkodra qyteti i qëndresës fisnike, i priu hapjes së objekteve të kultit
Nga OraNews Përditësimi i fundit 17 Nëntor 2023, 08:03
Kryetari i Partisë Demokratike, Lulzim Basha mori pjesë sot në Shkodër në ceremoninë e nderimit me titullin “Lisi i Artë” të dy personalitet të shquara që edhe në ditët me të errëta, ndriçuan mendjet dhe zemrat e shqiptarëve përmes besimit në Zot, kardinalit Mikel Koliqi dhe Haxhi Hafiz Sabri Koçi
Lëvizja Studentore Shqiptare “Dhjetor -90 Shkurt -91” ndau titujt me motivacionin “ Për kontribut të lartë në shërbim të kombit, Lirisë dhe Demokracisë”.
Në fjalën e tij kryetari i PD vlerësoi se rihapja e objekteve të kultit i dha jetë rizgjimit shpirtëror dhe politik të vendit, pas një errësire nën diktaturën më të egër komuniste në kontinent.
“Rihapja e objekteve të kultit pas ndalimit të lirisë së besimit përbën një nga momentet kulmore të kujtesës tonë kolektive, që duhet trashëguar brez pas brezi, për të mos lejuar qe harresa të davarisë dhimbjet e shënuara në trupin e shoqërisë tonë nga regjimi gjakatar. Por gjithashtu, për të mos harruar se përtej kalvarit të gjatë të vuajtjeve, vrasjeve, hetimeve, shkatërrimeve, shpresa dhe dashuria për Zotin ngadhënjyhen përkundër një përbindëshi që ishte në çastet e tij të fundit, por sigurisht ende i rrezikshëm,- theksoi Basha
Basha vlerësoi Shkodrën si qyteti i qëndresës fisnike që i priu guximshëm çeljes së objekteve të kultit, duke sfiduar hapur diktaturën ndërsa solli në vëmendje dhe meshën e parë të mbajtur nga Dom Simon Jubani
“Dyert e shtëpisë së Zotit u hapën sërish pas 23 vitesh. Shpresa oshëtiu anembanë vendit. Ashtu siç oshëtinë nga emocionet dhe lutjet e njerëzve kisha te varrezat e Rrmajit, ku më 11 nëntor 1990, u mbajt mesha e parë solemne, e ndjekur nga më shumë se 40 mijë besimtarë, e drejtuar nga kleriku Dom Simon Jubani, i cili gjysmën e jetës së tij e kaloi në galerat e komunizmit, por jetoi që të shihte dhe udhëhiqte atë grigjë larg errësirës antinjerëzore”- theksoi kryetari i PD ndërsa u ndal edhe tek falja e namazit në Xhaminë e Plumbit.
“Ajo javë e madhe do të mbyllej më 16 nëntor, te Xhamia e Plumbit ku u mbajt falja e namazit për të gjithë shkodranët, që pa dallim feje morën guximin ta ndiqnin këtë ceremoni. Mbi 55 mijë njerëz, ndoqën klerikun e nderuar mysliman Haxhi Hafiz Sabri Koçi, i burgosur për shumë vjet nga regjimi komunist, i cili këndoi Ezanin pas 23 vitesh heshtjeje. Ngjarje madhështore, që do të jehojnë gjatë në histori edhe për një koponent të rëndësishëm që i bën ato pa kohë, të vlefshme për të mësuar prej tyre sa herë që humbasim besimin, orientimin dhe shpresën”, tha në fjalen e tij Lulzim Basha.
Kryetari i PD u ndal edhe tek bashkëjetesa fetare si një model kulturor në gjithë Shqipërinë.
“Pavarsisht besimeve dhe prejardhjes, pavarsisht rreziqeve dhe frikës, ata njerëz u bashkuan për t’i dhënë fund një diktature, që pak muaj më vonë, edhe për meritë të tyre, do t’i linte vend zhvillimeve demokratike. Sot, ky është një mësim i vlefshëm për këdo që kërkon ripërtëritjen e vlerave që me shumë mund dhe sakrifica u fituan 33 vite më parë. Ndaj dhe përgjigjja e vetme kalon përmes besimit, bashkimit dhe vlerave. Sot, 33 vite më parë, e përgjithmonë, -përfundoi mesazhin e tij kryetari i PD Lulzim Basha.
