Izraeli bombardon një kishë në gaza, raportohet për viktima
Nga OraNews Përditësimi i fundit 24 Tetor 2023, 16:32
Një sulm ajror izraelit ka vrarë dhe plagosur një numër të madh qytetarësh, që strehoheshin në kishën ortodokse greke të Shën Porfirit në qytetin e Gazës.
Zyrtarët në Gaza raportuan se të paktën 18 palestinezë të krishterë ishin në mesin e të vdekurve.
Mes tyre 7 fëmijë dhe dy vajza të reja, njëra e quajtur Viola dhe tjetra Yara.
Ushtria izraelite tha se avionët e saj luftarakë kishin goditur një qendër komandimi dhe kontrolli të përfshirë në lëshimin e raketave dhe mortajave drejt Izraelit.
"Si rezultat i sulmit të IDF, një mur i një kishe në zonë u dëmtua,ne jemi në dijeni të raporteve për viktima. Ngjarja është nën shqyrtim", thanë ata.
Shën Porfiri, i ndërtuar rreth vitit 1150, ishte kisha më e vjetër në përdorim ende në Gaza. E vendosur në një lagje historike të qytetit të Gazës, kisha u ofroi vend të shenjtë njerëzve të besimeve të ndryshme gjatë brezave.
Gaza është goditur nga një breshëri e pamëshirshme izraelite pas një sulmi nga luftëtarët e Hamasit më 7 tetor, për të cilin Izraeli thotë se vrau të paktën 1400 njerëz, shumica prej tyre civilë.
Fushata e Izraelit që atëherë ka vrarë të paktën 3,785 palestinezë në Rripin e Gazës, shumica prej tyre civilë, sipas ministrisë së shëndetësisë së Hamasit.
