Erdogan mund të takohet me Putinin për marrëveshjen e grurit të Detit të Zi
Nga OraNews Përditësimi i fundit 22 Gusht 2023, 13:40
Presidenti turk, Recep Tayip Erdogan, tha se mes një programi të ngjeshur, muajin e ardhshëm, nëse i jepet mundësia, mund të zhvillojë bisedime ballë për ballë me homologun e tij rus, Vladimir Putin, për të diskutuar marrëveshjen e grurit të Detit të Zi.
“Në shtator, kemi takimin e G20-ës në Indi dhe Asamblenë e Përgjithshme të OKB-së në SHBA. Nëse gjejmë mundësinë në këtë mjedis të ngarkuar, do të takohemi dhe bisedojmë me Putinin ballë për ballë”, u tha sot Erdogan gazetarëve, në aeroplanin presidencial, ndërsa kthehej nga vizita e tij në Hungari.
Erdogan bëri një vizitë njëditore në kryeqytetin Budapest për festën e ditës kombëtare të Hungarisë.
Ai u takua veçmas me homologen e tij hungareze Katalin Novak dhe kryeministrin Viktor Orban për të diskutuar lidhjet dypalëshe, si dhe zhvillimet rajonale dhe globale.
Ministri i Jashtëm turk, Hakan Fidan, mund të vizitojë Rusinë së shpejti për të zhvilluar bisedime ballë për ballë, tha Erdogan, duke shtuar se kjo mund të japë rezultate më të mira.
Për bisedimet e mundshme të paqes Rusi-Ukrainë, Erdogan tha se shpreson të ketë rezultate nëse Putin dhe presidenti ukrainas, Volodymyr Zelensky, bien dakord për ndërmjetësimin turk.
Ankaraja ka bërë përpjekje intensive në rrugë diplomatike për rifillimin e marrëveshjes.
Turqia, e cila mori vlerësime ndërkombëtare për rolin e saj unik ndërmjetësues midis Ukrainës dhe Rusisë, i ka bërë vazhdimisht thirrje Kievit dhe Moskës që t’i japin fund luftës, tashmë mbi 500 ditëshe, përmes negociatave. /os/
