KQZ jep mandatin Memollajt, merr zyrtarisht postin si kryebashkiak i Rrogozhinës
Nga OraNews Përditësimi i fundit 1 Gusht 2023, 17:52
KQZ certifikoi rezultatin e zgjedhjeve të pjesshme të 23 Korrikut në Bashkinë Rrogozhinë, duke shpallur fitues socialistin Edison Memollaj. Zgjedhjet në Rrogozhinë u përsëritën për shkak të parregullsive të procesit të 14 majit.
Edison Memollaj është zyrtarisht kryetar i bashkisë së Rrogozhinës.
Ai mori mandatin nga KQZ një javë pasi rezultoi fitues në procesin zgjedhor të 23 korrikut përballë kandidatit të opozitës Shkëlqim Hoxha.
Kandidati i PS, fitoi edhe në zgjedhjet e 14 majit, por kolegji zgjedhor vendosi përsëritjen e procesit për shkak të parregullsive në kutinë e burgut të Rrogozhinës.
Rivotimi prodhoi rezultat të qartë mes rivalëve. Kandidati i PS mori 6658 vota ndërsa kandidati i koalicionit bashke fitojmë, 4906 vota .
Nga 21 vota ne 14 maj, diferenca mes Edison Memollajt dhe Shkëlqim Hoxhës ishte 1752 sipas të dhënave zyrtare.
Ndryshe nga procesi i 14 Majit, opozita nuk ankimoi procesin brenda 5 ditëve dhe KQZ certifikoi rezultatin me një vendim që hyri në fuqi menjëherë.
Komisioni Qendror i zgjedhjeve pritet ndërkohë të miratojë rezultatin përfundimtar në rang vendi për partitë politike, duke mbyllur përfundimisht procesin e zgjedhjeve për pushtetin vendor.
